Astanada núkteli qurylysqa qarsy qabyldanǵan sheshimderdiń nátıjesi qandaı
ASTANA. KAZINFORM – Astana ákimdigi qoǵamdyq tyńdaý ótkizilmeıinshe «IQONIQ» turǵyn úı kesheniniń qurylysyna ruqsat bermeıdi. Bul týraly elordalyq máslıhattaǵy qoǵamdyq tyńdaýlar barysynda Astana qalasynyń Sáýlet, qala qurylysy jáne jer qatynastary basqarmasynyń basshysy Altynbek Ahmetov aıtty.
Onyń aıtýynsha, búginde elordadaǵy núkteli qurylys máselesi turaqty baqylaýda tur.
– Buǵan deıin qala boıynsha núkteli qurylysqa qatysty 23 nysan anyqtalǵan bolatyn. Onyń 22-si boıynsha turǵyndardyń pikirin eskere otyryp, mektep, medıtsınalyq mekeme, balabaqsha, skver sekildi áleýmettik nysandar ornalastyrý týraly sheshim qabyldandy. Al qalǵan bir nysan – Aqbulaq-3 shaǵynaýdanyndaǵy Qadyrǵalı Jalaıyr kóshesi, 6 mekenjaıynda ornalasqan «IQONIQ» turǵyn úı kesheni. Bul joba boıynsha sottyń qurylys júrgizýge qatysty sheshimi bar. Degenmen ákimdiktiń ishki hattamasyna sáıkes, nysan qoǵamdyq tyńdaýdan ótpeıinshe qurylysqa ruqsat berilmeıdi, – dedi Altynbek Ahmetov.
Spıkerdiń málimetinshe, qazir Premer-mınıstrdiń tapsyrmasy boıynsha Astananyń Bas josparyna túzetýler engizý jumystary júrgizilip jatyr. Qujat qalalyq máslıhat sessııasynda qaralyp, qoǵamdyq tyńdaýlardan ótken jáne vedomstvodan tys memlekettik saraptamanyń oń qorytyndysyn alǵan.
- Qazirgi ýaqytta bul qujat Úkimet portalyna júkteldi. Ony bekitý týraly Úkimet qaýlysyna qol qoıyldy, – dedi basqarma basshysy.
Sondaı-aq ol zańnamaǵa qala qurylysy reglamentteri bekitilgenge deıin jurtshylyqpen talqylaý ótkizýge qatysty ózgerister engizilgenin atap ótti.
– 2024 jyldan beri ákimdik qurylys kompanııalarymen jáne qoǵam ókilderimen birlesip 311 qoǵamdyq talqylaý ótkizdi. Bul turǵyndardyń pikirin eskerýge, núkteli qurylystyń aldyn alýǵa, áleýmettik ınfraqurylymǵa túsetin júktemeni azaıtýǵa jáne halyqtyń qajettilikterine saı jaıly qalalyq orta qalyptastyrýǵa múmkindik beredi, – dedi ol.
Altynbek Ahmetovtiń aıtýynsha, 2024 jyldan beri biryńǵaı qala qurylysy saraptamasy aıasynda egjeı-tegjeıli josparlaý jobalary boıynsha tek 9 nysan ǵana tekserýden sátti ótken.
- Bul jobalyq qujattamaǵa qoıylatyn talaptardyń joǵary ekenin jáne júrgiziletin saraptamanyń muqııattyǵyn kórsetedi. Keshendi tekserý barysynda zańnama talaptarynyń yqtımal buzylý faktileri qala qurylysy josparlaý kezeńinde anyqtalyp, olardyń aldy alynady. Sonymen qatar jobalardyń belgilengen normalar men standarttarǵa sáıkestigi qamtamasyz etiledi, – dedi basqarma basshysy.
Onyń sózinshe, Memleket basshysynyń zańsyz ári retsiz qurylysty joıý jónindegi tapsyrmasyn oryndaý maqsatynda Memlekettik qala qurylysy kadastry júıesinde bastapqy ruqsat qujattaryn berý jáne eskızdik jobalardy kelisý protsesteri tolyq tsıfrlandyrylǵan.
– Búginde bul qyzmetterdiń barlyǵy memlekettik qyzmet retinde kórsetiledi. Bizdiń paıymdaýymyzsha, Sáýlet basqarmasy atalǵan qyzmetterdi tolyq kólemde ári sapaly túrde usynyp otyr, – dedi Altynbek Ahmetov.
Buǵan deıin Astanada jyl basynan beri qurylys salasynda 160 mln teńgeden astam aıyppul salynǵanyn jazǵanbyz.
