Astanada nóser jaýynnan keıin EXPO aýmaǵynda birneshe ǵımaratty sý basty
NUR-SULTAN. QazAqparat – Búgin tolassyz jaýǵan jańbyr saldarynan elordanyń EXPO aýdanyndaǵy birneshe ǵımaratty sý basyp qaldy, dep habarlaıdy QazAqparat.
Olardyń qatarynda «Hilton Astana» qonaq úıi de bar.
QazAqparat tilshisiniń saýalyna jaýap bergen qonaq úıdiń basshylyǵy meımandar ýaqytyly evakýatsııalanǵanyn jetkizdi.
«8 tamyz kúni shamadan tys jaýǵan jaýyn saldarynan elordanyń EXPO aýdanyndaǵy birneshe ǵımaratty sý alyp ketti. Olardyń ishinde Hilton Astana qonaq úıi bar. Saǵat shamamen 12:40-ta qonaq úıdiń kireberisin sý basty. Qonaqtar ýaqytyly evakýatsııalandy. Qazirgi ýaqytta aldyńǵy kireberistiń tóbesinen aqqan sý toqtady. Qonaq úı qalypty rejımde jumys istep tur. Kelýshiler úshin eshqandaı qaýip joq», - dep málim etti qonaq úıdiń basshylyǵy.
Qonaq úıdiń dereginshe, oqıǵanyń sebebin taıaýda mamandar anyqtaıdy.
Sonymen qatar, áleýmettik jelilerde Astana IT University oqý ornyn sý basyp ketkeni kórsetilgen vıdeo tarady.
Atalǵan ýnıversıtettiń baspasóz qyzmeti bul jaǵdaıǵa resmı túsinikteme berýge ýáde etti.
Vıdeodan alynǵan kadr
