Astanada nómirin matamen jaýyp qoıǵan kólik júrgizýshisi qamaýǵa alyndy
ASTANA. KAZINFORM — Astanada beınekameraǵa túspeý úshin júk kóliginiń memlekettik nómirin matamen jaýyp qoıǵan 24 jastaǵy júrgizýshi kólik basqarý quqyǵynan aıyryldy.
Qalada «Qaýipsiz jol» jedel-profılaktıkalyq is-sharasy ótip jatyr. Onyń alǵashqy kúninde polıtsııa jol qozǵalysy erejelerin buzýdyń 600-ge jýyq deregin anyqtady.
Olardyń ishinde jolaýshylar men júkterdi tasymaldaý talaptaryn buzýdyń 200-den astam, tehnıkalyq talaptarǵa saı kelmeıtin kólikti basqarýdyń 100-den astam jáne kólik júrgizý kezinde telefon paıdalanýdyń 90-ǵa jýyq deregi bar.
Sondaı-aq kólikti zańsyz qaıta jabdyqtaýdyń 15 deregi jáne qarsy baǵyttaǵy jolaqqa shyǵýdyń 11 faktisi tirkeldi.
Júk kóliginiń júrgizýshisi qalaǵa kireberiste ustaldy. Ol beınekameraǵa túspeý maqsatynda Howo kóliginiń memlekettik nómirin matamen jaýyp qoıǵan.
Sot sheshimimen júrgizýshi bir jylǵa kólik basqarý quqyǵynan aıyrylyp, qamaýǵa alyndy.
Polıtsııa memlekettik tirkeý nómirlerin jasyrý jáne jol qozǵalysy erejelerin buzý zańda belgilengen jaýapkershilikke ákep soǵatynyn eskertti.
Eske salaıyq, buǵan deıin Abaı oblysynda bir kúnde 306 júrgizýshi jol erejesin buzǵanyn habarlaǵanbyz.
