Astanada Nomad MMA stıli boıynsha jarys ótedi
ASTANA. QazAqparat - Astanada qazannyń 20-21 aralyǵynda «Dáýlet» sport kesheninde Nomad MMA stılinde VIII Halyqaralyq «Azııa jaýyngeri» týrnıri ótedi, dep habarlaıdy Nomad MMA Halyqaralyq federatsııasynyń baspasóz qyzmeti.
Baspasóz málimetterine qaraǵanda, sharany Nomad MMA Halyqaralyq federatsııasy Qazaqstan Respýblıkasynyń Mádenıet jáne cport mınıstrligi, Astana qalasynyń ákimdigi, Respýblıkalyq jaýyngerlik óner birlestigimen birlesip uıymdastyrmaq.
Azııanyń eń myqtysy ataǵyna 500 jýyq sportshy baq synasady dep kútilýde. Olar: Qazaqstan, Pákistan, Iran, Úndistan, Bangladesh, Ózbekstan, Ázerbaıjan, Qyrǵyzstan, Aýǵanstan jáne Reseı elderiniń ókilderi.
Jarystyń maqsaty - buqaralyq sportty nasıhattaý, óskeleń urpaqty salaýatty ómir saltyn ustanýǵa shaqyrý.
Aıta keteıik, jekpe-jektiń qazaqstandyq túri «Nomad MMA» halyqaralyq deńgeıde qarqyndy túrde damyp keledi. Elimizde atalmysh sport túri boıynsha, túrli týrnırler ótkizilýde. Búgingi tańda, Federatsııa aıasynda 14 myń bala qamtylǵan. Al 15 jyldyq tarıhy bar Álemdik Federatsııa jastardy kásibı sportshylardyń dúnıejúzilik elıtasyna kirýine múmkindik jasap otyr.
Qazirgi kezde Álemdik Federatsııa quramyna 15 memleket ókilderi kirip otyr.
