Astanada Nighvill Kazakhstan qurylys kompanııasyna 680 myń teńge aıyppul salyndy
ASTANA. QazAqparat - «Nighvill Kazakhstan» qurylys kompanııasyna qala aýmaǵyn qurylys qaldyqtarymen lastaǵany, qoqys tastaǵany, jumys óndirisin baqylamaǵany úshin aıyppul salyndy, dep habarlaıdy «QazAqparat» HAA tilshisi Astana qalalyq ІІD jergilikti polıtsııa qyzmetine silteme jasap.
Aýdannyń tabıǵatty qorǵaý polıtsııasy Turan men Uly dala dańǵyldarynyń qıylysynda tyıym salynǵan orynǵa qurylys qaldyqtaryn tógip jatqan «SAMS» markaly avtomashınanyń júrgizýshisin ustaǵan. Júrgizýshi QR Ákimshilik quqyq buzýshylyq kodeksiniń 505-baby, 2-tarmaǵy «Qalalar men eldi mekenderdiń aýmaqtaryn abattandyrý qaǵıdalaryn buzý, sondaı-aq qalalar men eldi mekender ınfraqurylymy obektilerin buzý, jasyl ekpelerin joıý jáne búldirý» boıynsha ákimshilik jaýapqa tartylyp, 68 070 teńge somasynda aıyppul salyndy.
Qoqystyń «Haıvıl park» TK qurylys nysanynyń aýmaǵynan shyǵarylǵany belgili boldy, sondaı-aq qurylys qaldyqtaryn shyǵarý boıynsha qyzmet kórsetetin merdiger uıym anyqtaldy. «Nighvill Kazakhstan» JShS qurylys kompanııasyna qala aýmaǵyn qurylys qaldyqtarymen lastaǵany, qoqys jasaǵany, jumys óndirisin baqylamaǵany úshin 680 700 teńge (300 AEK), al «Shakeeva T.O.» JK merdiger uıymyna 68 070 teńge aıyppul salyndy.
Jalpy, jyldyń basynan beri qoqysty, qardy jáne qaldyq sýdy tyıym salynǵan jerge tókkeni úshin 141 júrgizýshige jalpy somasy 3 mln teńge bolatyn aıyppul salynǵan.
