Astanada neshe mektep salynady

ASTANA. QazAqparat - QR Bilim jáne ǵylym mınıstri Kúlásh Shámshıdınova Astanadaǵy mektepterdiń qurylysy týraly aıtyp berdi, dep xabarlaıdy QazAqparat tilshisi.

«Endi, qazir Astana boıynsha mektepterdiń jetispeýshiligin bárimiz jaqsy bilemiz. Sebebi jastarymyz bar, dúnıege kelip jatqan balalar bar. Oǵan qosa, kóship kelip jatqan adamdar az emes. Qazir Astana qalasy boıynsha 2019-2021 jyldarǵa 19 joba iske asyrylatyn bolsa, ákimshilikpen birge qalanyń shetindegi aýyl-aımaqtardy qaraı otyryp, taǵy úsh jobaǵa qarjy qarastyryp jatyrmyz. Sonymen Astana qalasy boıynsha 21 jobany júzege asyramyz degen oıymyz bar», - dedi K.Shámshıdınova Astanadaǵy kópbalaly analarmen bolǵan kezdesýde.

Mınıstrdiń aıtýynsha, Táýelsizdik alǵaly beri respýblıka boıynsha 1 672 mektep salyndy. Al Astanada 68 mektep jańadan boı kótergen.

«Aldaǵy úsh jylda jalpy respýblıka boıynsha 190 mektep salynatyn bolsa, bul mektepter eń birinshi apatty ǵımaratta ornalasqan mektepterdiń problemasyn sheshedi. Ekinshiden, úsh aýysymmen oqıtyn mektepterdiń problemasyn sheshedi», - dep atap kórsetti K.Shámshıdınova.

Aıta keteıik, búgingi kezdesýde mınıstr mektepte tórt pándi aǵylshyn tilinde oqytý máselesin túsindirdi.

«Búginde barlyq adamdardy oılandyryp júrgen mańyzdy bir másele ol - xımııa, fızıka, ınformatıka men bıologııa pánderin joǵary klasta aǵylshyn tilinde oqytý. Osyǵan baılanysty qazir asyqpaı kóshý týraly sheshim qabyldanyp otyr. Respýblıka boıynsha 150-den artyq mektep ol baǵdarlamaǵa kóshken. Biz qazir bulardy zerdelep, qarap otyrmyz. Oqýshylar neden qınalyp otyr? Ustazdar qandaı qıyndyq kórip jatyr? Biz olarǵa qalaı kómektesemiz? Sony jan-jaqty zerdelep jatyrmyz. Sondyqtan ustaz daıyn bolǵan kezde, mektep daıyn bolǵan kezde ózderińizben kelise otyryp, birtindep aǵylshyn tilinde oqytýdy engize bastaımyz. Bul asyǵatyn sharýa emes», - deıdi K.Shámshıdınova.

Budan bólek, bilimniń jańartylǵan mazmuny boıynsha myńdaǵan mektep muǵalimderi qaıta daıarlaý kýrstarynan ótetin bolady.