Astanada «Neonomad» kórmesi ashyldy (FOTO)
ASTANA. QazAqparat - Qazaqstan Respýblıkasy Ulttyq mýzeıinde Astana qalasynyń jas sýretshilerinen quralǵan «KADMII QYZYL» art-tobynyń «Neonomad» atty kórmesi ashyldy, dep habarlady Ulttyq mýzeıdiń baspasóz qyzmeti.
Kórmeniń ashylýynda sóz alǵan Ulttyq mýzeı dırektory Darhan Myńbaı jastardyń zamanaýı jumystaryn joǵary baǵalap, olarǵa shyǵarmashylyq tabystar tiledi.
- Bul jumystardyń barlyǵy da talantty jas sýretshilerdiń ishki dúnıelerin ashyp kórsetedi. Mundaı jańa bastamalarǵa árqashan qoldaý bildirýimiz kerek. Sebebi biz úshin ónerdiń orny bir bólek. Aldaǵy ýaqytta da mundaı tyń ıdeıalardyń avtorlaryn Ulttyq mýzeıden kórgimiz keledi. Sondyqtan talapty 7 sýretshiniń shyǵarmashylyq jumystaryna tabys tileımin, - dedi D.Myńbaı.
«KADMII QYZYL» art-toby 2010 jyly qurylǵan. Onyń qatarynda Beıbit Ásemqul, Aıgerim Jumaǵalıeva, Álııa Qanybekova, Natalıa Lıgaı, Jeńis Moldabekov, Almas Oraqbaı, Gúlmaral Tátibaeva esimdi jastar bar. Barlyǵy kórmege 30-ǵa jýyq jumys qoıyldy. Olardyń arasynda ınstallıatsııa, fotosýretter, vıdeo-art jáne perfomans bar.
Kórmeniń tujyrymdamasyn ártúrli jaǵdaılarmen tastap ushyp ketetin týǵan úıdiń sımvoly «Uıa» ınstalıatsııasy belgileıdi. Qazirgi tańda baqytty ómir izdegen adamdar ózderiniń «ornyqqan» oryndaryn qustar sııaqty tastap ketedi. Álemde únemi qozǵalys, adamdar qaladan-qalaǵa, bir elden ekinshi elge, bir qurlyqtan ekinshi qurlyqqa kóship jatady. Ómirdiń zamanaýı kóshý beınesi búkil álemge ortaq, búgingi kóshpeliler - neonomadtar - ózin jáne óz baqytyn tabý úshin oryn aýystyryp jatady. Osy arada, óz tamyryńnan qol úze otyryp, ózińniń kim jáne qaıdan ekenińdi umytpaý óte mańyzdy!
Sonymen qatar, kórmege Natalıa Lıgaıdyń «Ómir elesi», Álııa Qanybekovanyń «Týǵan jerim tuǵyrym», Gúlmaral Tátibaevanyń «Zamana kóshi», Almas Oraqbaıdyń «Jurt» fotosýretteriniń toptamasy qoıylady. Osy jumystarda sýretshiler qonys aýdarýdyń áleýmettik-mádenı úrdisine óz kózqarastary men oılaryn bildirýge tyrysady.
Qala óz tóńiregindegi eldi mekender men olardyń turǵyndaryn ózine sińire otyryp qarqyndy ósýde. Megapolısterdegi adamdar qum qıyrshyǵy sııaqty. Alaıda árbir adam biregeı jáne talantty, Aıgerim Jumaǵalıevanyń «Qala alpaýyttary» toptamasymen jasalǵan fototýyndylary osy týraly áńgimeleıdi. Sýretshi sáýlettik ansamblderdi emes, músin kompozıtsııalaryn emes, qalany jasaıtyn jáne oǵan jan kirgizetin adamdardy jyrlaıdy.
Jeńis Moldabekovtyń «Tarıh qoınaýynan jarqyn bolashaqqa» toptamasymen jasalǵan fototýyndylary babalarymyzdyń kóship-qonǵan joldarymen búgingi temir joldar ótip jatýy yqtımal Qazaqstannyń keń baıtaq dalasyna erekshe oryn beredi. Sýretshi óz sıýjetterinde qazirgi men keshegini ushtastyrady.
Beıbit Ásemquldyń «Sheksizdik» toptamasymen jasalǵan fototýyndylary áıelderge arnalǵan. Qazaq mádenıetindegi áıel - otbasy men dástúrdiń saqtaýshysy. Sýretshi qazirgi zamandaǵy áıeldiń klassıkalyq beınesiniń ózgerýi týraly oı tolǵaıdy.
Kórme 26 maýsymǵa deıin jumys isteıdi.
