Astanada nemis jáne frantsýz kompanııalarynyń túzeý mekemeleri obektileri qurylysynyń tanystyrylymy ótti - QR ІІM
ASTANA. QazAqparat - Memleket basshysy Nursultan Nazarbaevtyń 5 ınstıtýtsıonaldy reformasyn júzege asyrý boıynsha 100 naqty qadamnyń biri (34-qadam) - memlekettik-jeke seriktestik ádisimen penıtentsıarlyq ınfraqurylymdy jańǵyrtý bolyp tabylady.
Penıtentsıarlyq ınfraqurylymdy jańǵyrtý aıasynda arnaıy kontıngentti kamera boıynsha ustaýǵa mamandandyrylǵan jańa túzeý mekemeleriniń qurylysyn salý máselesin sheshý qajet.
Nátıjesinde respýblıkamyzdyń barlyq aýmaqtarynda shamamen 25 túzeý orynyn salý kózdelýde, ol dál qazirgi jaǵdaıda memlekettik bıýdjetten úlken qarajatty talap etedi.
Bul máseleni sheshýde ІІM zańnamada belgilengen tártipte jeke ınvstorlardy tartýdy usynady, ásirese kontsessııa shemasy boıynsha, qazirgi tańda ol AQSh, Frantsııa, Ulybrıtanııa jáne basqa da elderde iske asyrylǵan.
Osyǵan baılanysty 1 qazanda Іshki ister mınıstrliginde Qazaqstan Respýblıkasy Prezıdenti Ákimshiliginiń quqyq qorǵaý júıesi bóliminiń meńgerýshisi E.Á. Kenenbaevtiń, QR Іshki ister mınıstri Q.N. Qasymovtyń, ІІM qyzmet basshylarynyń, Qarjy jáne ulttyq ekonomıka mınıstrlikteriniń, «MJS-niń qazaqstandyq ortalyǵy» AQ ókilderiniń qatysýymen nemis «DORSh-GRÝPP» jáne frantsýz «Vınsı Konstrıýson Gran Proje» kompanııalarynyń túzeý mekemeleriniń obektileriniń qurylysy jónindegi tanystyrylymy ótkizildi.
Іs-sharaǵa qatysýshylar túrli elderdegi túzeý mekemeleri qurylysynyń jobalarymen tanysty, qarjylandyrý, qurylysty jobalaý, basqarý, sondaı-aq Qazaqstan Respýblıkasyndaǵy túzeý mekemeleri aýmaǵynda óndiris oryndaryn uıymdastyrý máselelerin talqylady. Kezdesýde qatysýshylar tájirıbemen almasyp, memlekettik organdar men kásipkerler arasyndaǵy áriptestikti keńeıtý boıynsha jańa usynymdardy zerdeledi, dep habarlaıdy QR ІІM Baspasóz qyzmeti.
