Astanada «Ne? Qaıda? Qashan?» oıynynyń ІІ Chempıonaty ótedi
ASTANA. 30 qańtar. QazAqparat - 18-19 aqpan kúnderi Astanada «Samuryq-Qazyna» UÁQ» AQ men Radisson Hotel Astana-nyń demeýshiligimen «Ne? Qaıda? Qashan?» oıynynyń ІІ Qazaqstandyq chempıonaty ótedi.
Bul týraly Ulttyq qordyń baspasóz qyzmetine habarlady.
Chempıonatqa Qazaqstannyń 8 qalasynan - Astana, Almaty, Aqtaý, Qaraǵandy, Temirtaý, Pavlodar, Óskemen jáne Shymkentten barlyǵy 24 komanda qatysady. Qazylar alqasyna reseılik «Svoıa ıgra» zııatkerlik oıynynyń rekordsmeni Anatolıı Vasserman, sondaı-aq «Ne? Qaıda? Qashan?» elıtalyq klýbynyń «hrýstaldi úkisin» ıelengen, atalmysh oıyndar boıynsha 2010 jylǵy álem chempıonatynyń qola júldegeri Grıgorıı Alhazov shaqyrylyp otyr.
«Samuryq-Qazyna» qorynan málim etkendeı, chempıonatqa atalmysh baǵdarlamanyń qazaqstandyq nusqasyna qatysýshy barlyq bilgirler shaqyrylyp otyr. Zııatkerlik týrnırdiń jeńimpazy aǵymdaǵy jyly kúzde ótetin «Ne? Qaıda? Qashan?» oıynynyń álem chempıonatynda Qazaqstannyń namysyn qorǵaıtyn bolady.
Eske salaıyq, «Ne? Qaıda? Qashan?» oıynynyń І-chempıonaty 2011 jyly maýsym aıynda Aqtaýda ótti. Jeńimpaz aqtaýlyq «Ankor» komandasy boldy.
