Astanada «Ne? Qaıda? Qashan?» oıynynan álem chempıonaty ótýde
ASTANA. QazAqparat - «Astana» halyqaralyq qarjy ortalyǵynyń qoldaýymen elordada «Ne? Qaıda? Qashan?» oıynynyń XV álem chempıonaty ótip jatyr, dep habarlaıdy QazAqparat Astana HQO baspasóz qyzmetine silteme jasap.
3-5 qarasha kúnderi Astanada ótetin bul aıtýly chempıonatta álemniń 26 elinen kelgen 69 komanda baq synaıdy. Qazaqstan Respýblıkasy atynan Astana, Almaty, Qaraǵandy jáne Aqtaý qalalarynan kelgen 8 komanda qatysýda. Sondaı-aq, negizgi týrnır aıasynda «Hamsa» halyqaralyq zııatkerlik oıynynyń alǵashqy Ulttar kýbogy ótip jatyr. Osylaısha, týrnırge jalpy sany 650 bilgir jınaldy.
Chempıonattyń resmı ashylýynda sóz sóılegen AHQO Basqarýshysy Qaırat Kelimbetov «Astana» halyqaralyq qarjy ortalyǵynyń Qazaqstandaǵy adamı kapıtal men zııatkerliktiń damýyna júıeli túrde qoldaý bildirip kele jatqanyn atap ótti.
«Kez kelgen memleket adamı kapıtaldyń damýyna qoldaý bildiredi. Adamı kapıtal men onyń damýy - Memleket basshysy bekitken AHQO strategııasynyń mańyzdy baǵyty. Qazaqstanda dál osyndaı sharalardyń ótip jatqany qýantady jáne bizdiń elimizdiń «Ne? Qaıda? Qashan?» oıynynyń spottyq kúntizbesinde nyq ornyǵaryna úmittenemiz», - dedi Q.Kelimbetov.
Saıystar «Ne? Qaıda? Qashan?» oıynyń magıstri jáne Klýbtardyń halyqaralyq qaýymdastyǵynyń prezıdenti Andreı Kozlovtyń jáne Aleksandr Drýz, Maksım Potashev, Balash Qasymov, Vladımır Antohın, Elızaveta Ovdeenko, Aleksandr Rýbın syndy «Ne? Qaıda? Qashan?» juldyzdarynyń qatysýymen ótip jatyr. Sondaı-aq, Astanaǵa ChGK Eýrazııalyq lıgasynyń tóraǵasy Azızbek ıÝsýfov (Ózbekstan), «Hamsa» halyqaralyq oıynynyń avtorlary men negizin salýshy Faık Gýseınov (Ázerbaıjan) keldi.
«Ne? Qaıda? Qashan?» teleoıyny KSRO-da rejısser Vladımır Voroshılov pen redaktor Natalıa Stetsenkonyń ıdeıasymen qurylǵan. Baǵdarlamanyń alǵashqy shyǵarylymy 1975 jyldyń 4 qyrkúıeginde efırden kórsetilgen.
Sporttyq «Ne? Qaıda? Qashan?» - televızııalyq oıynnyń saıystyq nusqasy. Munda arnaıy komandalar qurylyp, jeńimpaz topty durys jaýap sanymen anyqtaıdy.
«Hamsa» - 2011 jyly «Ne? Qaıda? Qashan?» oıynynyń álem birinshiliginde tanystyrylǵan komandalyq zııatkerlik oıyn. Oıyn erejesine sáıkes «Hamsa» bes sanynyń aınalasynda qurylǵan: komandada 5 oıynshy bolady jáne barlyq oıyn 5 raýndtan quralady.
