Astanada Naýryzdy merekeleıtin kúnderi jol qaýipsizdigin 400-ge jýyq polıtsııa qamtamasyz etedi
ASTANA. 17 naýryz. QazAqparat - Naýryz meıramynda Astanada keıbir avtobýstardyń baǵyty ózgerip, birqatar kóshelerde qozǵalysqa shekteý qoıylady.
Astana ákimdiginiń málimetine qaraǵanda, 2012 jylǵy 19-22 naýryz aralyǵynda Ulystyń uly kúnin merekeleý kezinde Astanada birqatar joldar jabylady. Bul sharalar jol qozǵalysynyń qaýipsizdigin qamtamasyz etý úshin qoldanylyp otyr, dep túsindirdi Astana qalasynyń ІІD Jol polıtsııasy basqarmasy bastyǵynyń orynbasary Baqyt Malybaev.
«22 naýryz kúni «Qazaq eli» monýmentiniń aldyna kóp halyq jınalady. JPB ınspektorlary qozǵalysty keptelister bolmaıtyndaı etip uıymdastyrýy kerek», - dep atap ótti ol.
Onyń aıtýynsha, osy kúni tańerteńgi saǵat 8-den merekelik sharalar tolyǵymen aıaqtalǵanǵa deıin kólik quraldary úshin myna kósheler jabyq bolady:
- R.Qoshqarbaev kóshesinen bastap (Saraıshyq k-si) J.Nájimedenov (№42 kóshe) kóshesine deıingi - Táýelsizdik kóshesi;
- B.Momyshuly kóshesinen bastap Obaǵan kóshesine deıingi - Baıtursynov kóshesi;
- M1 kópirinen Obaǵan kóshesine deıingi - Saraıshyq kóshesi;
- M3 kópirinen Obaǵan kóshesine deıingi Syǵanaq kóshesi.
Merekelik sharalar ótý barysynda elorda turǵyndary men qonaqtary Orynbor kóshesi arqyly aınalma joldy paıdalanǵany jón.
«Kólik keptelisteriniń aldyn alý maqsatynda jáne «Qazaq eli» monýmentiniń aldynda avtoturaqta orynnyń azdyǵyna baılanysty meımandarǵa alańǵa qoǵamdyq kólikpen jetýdi usynamyz», - dedi B. Malybaev.
Ústimizdegi jylǵy 19-21 naýryz kúnderi qoǵamdyq kólik baǵyttary (№ 4, 14, 21) Obaǵan kóshesimen (Táýelsizdik Saraıynyń artynda) júrip otyrady.
«Qazaq eli» monýmenti alańyna kelýdi josparlap otyrǵan turǵyndar úshin 22 naýryzda kúndelikti osy baǵytpen júretin №№ 3, 4, 14, 21, 32, 35, 40 jáne 46 qoǵamdyq kólik baǵyttary tómendegideı ózgeredi:
№ 32, 35, 40 jáne 46 avtobýstar Saraıshyq kóshesi - M-1 kópiri -
Momyshuly dańǵyly, odan ári - qazirgi qozǵalys kestesi boıynsha júredi.
№ 3, 4, 14 avtobýstar - Táýelsizdik dańǵyly - Momyshuly dańǵyly -
Mırzoıan kóshesi «Qaraótkel» sońǵy aıaldamasyna deıin.
№ 21 avtobýs - M-3 kópiri - Qaldaıaqov kóshesi - Qaldaıaqov kóshesi-Nájimedenov kóshesi qıylysynda burylady jáne keri qaraı.
Mereke kúnderi elorda joldaryndaǵy jol qaýipsizdigin barlyǵy 400-ge jýyq polıtseı qamtamasyz etetin bolady.
