Astanada Naýryz meıramyn toılaý bastaldy
ASTANA. QazAqparat - Búgin elordada kóktem merekesi Naýryz meıramyna arnalǵan halyqtyq serýender bastaldy. Alǵashqy sharalar Jeleznodorojnyı, Internatsıonalnyı turǵyn alaptarynda ótkizildi, dep habarlaıdy Astana qalasynyń resmı saıty.
Tanymal qazaqstandyq artister jınalǵan qaýymnyń nazaryna kontserttik baǵdarlama usyndy. Klara Tólenbaeva, Dosymjan Tańatarov, Asqar Jaılaýbaev syndy otandyq estrada juldyzdary, «Dabyl», «Saryarqa», «Dáýir», «Retro», «Bým» toptary, «Alaman» jáne «Z» trıolary, «Dıart» jáne «Bastaý» ujymdary, «Art Music» kvarteti tanymal estradalyq ánder men halyq kompozıtorlarynyń ánderin oryndady.
Budan basqa, halyqaralyq festıvalderdiń jeńimpazdary, Astana qalasy Memlekettik akademııalyq fılarmonııasynyń solısteri Perızat Turarova, Janargúl Rahatqyzy, Jaqsykeldi Maıasarov, halyqaralyq jáne respýblıkalyq konkýrstardyń laýreaty, Prezıdenttik orkestrdiń solısti Aızat Qarabekova, dombyrashy Qurmanǵazy Baıtasov, ánshi Mádına Ahmetova, sondaı-aq Oljas Sábıjan, Áıgerim Hasanova, Ásem Omarova, Aıdana Smahanova jáne Baýyrjan Nurymbetov te kelýshilerge keremet kóńil-kúı syılady. «Іńkárim» horeografııalyq ujymynyń daryndy artısteri «Shashý», «Kóktem» bılerin bıledi. «Shaldar kúresi» men fleshmobtar kópshilikti tánti etti, úlken-kishiniń bári qosylyp «Qara jorǵa» bıin bıledi. Jınalǵandar úshin arqan tartý, gir kóterý jáne armrestlıngten jarystar uıymdastyryldy. Keıbiri toǵyzqumalaq ulttyq zııatkerlik oıynyn oınap, túrli ulttyq salt-dástúrlerdi tamashalady.
Ádemi bezendirilgen kıiz úıler, palaý, baýyrsaq pen merekeniń basty taǵamy - hosh ıisti Naýryz kóje - osynyń barlyǵy aýdandardyń turǵyndaryna umytylmas merekelik kóńil syılady.
«Biz aýdanda ótkiziletin Naýryzǵa arnalǵan kontsertke jyl saıyn qýana kelemiz. Merekelik kóńil kúı syılaǵandary úshin uıymdastyrýshylar men artısterge alǵysymdy bildiremin. Barshańyzǵa jańa jylda densaýlyq pen bar jaqsylyqty tileımin, - dedi kontsertti kórýge kelgen Jeleznodorojnyı turǵyn alabynyń turǵyny Bazargúl Qarabekova.
«Bizge osyndaı sharalar unaıdy. Jazda da bizdiń aýdanda keremet kontsert uıymdastyryldy. Kóńil-kúıimiz kóterińki, sýyq bolsa da, kúnniń kózi jarqyrap tur. Kontsertke balalarmen, kórshilerimizben, dostarymyzben birge, búkil otbasylarymyzben keldik. Naýryz meıramyn aýdanymyzda birinshi bolyp atap ótkenimiz jaqsy, 21-22 naýryzda qalanyń basty alańdarynda ótetin merekelik is-sharalarǵa da bara alamyz», - dedi Internatsıonalnyı turǵyn alabynyń turǵyny Ásemgúl Súleımenova.
Tanymal ánshi Perızat Turarova turǵyn alaptarynyń barlyq turǵyndaryn jáne astanalyqtardy kóktemniń shýaqty merekesi Naýryz meıramymen quttyqtady.
«Biz óz ánderimizben turǵyndarǵa kóterińki kóńil kúı syılaı aldyq dep oılaımyn. Barlyq qazaqstandyqtardy Naýryz merekesimen quttyqtaımyn, elimizdiń gúldenýin tileımin», - dedi ánshi.
Erteń, 18 naýryzda, saǵat 11.00-de, Naýryz meıramy qurmetine halyqtyq serýender Mıchýrıno jáne Promyshlennyı turǵyn alaptarynda ótedi, al 21 naýryzda Prıgorodnyı jáne Úrker turǵyn alaptarynda, 22 naýryzda Kóktal-1 jáne Óndiris turǵyn alaptarynda, 23 naýryzda Saraıshyq shaǵyn aýdanynda jalǵasyn tabady.
