Astanada Naýryz meıramy kúni birqatar avtojoldarda qozǵalys shekteledi
ASTANA. 18 naýryz. QazAqparat /Gúlmıra Álıakparova/ - Astanada Naýryz meıramy atap ótiletin kúni birqatar avtojoldarda qozǵalys shekteledi. Bul týraly qalalyq Jol polıtsııasy basqarmasynan habarlady.
JPB bastyǵy Baqytgeldi Aıqymbekovtyń aıtýynsha, 22 naýryz kúni jol qozǵalysy qaýipsizdigi sharalary kúsheıtiletin bolady. «Meıram atap ótiletin ýaqytta jol polıtseılerine úlken jaýapkershilik júkteledi. JPB ınspektorlary qozǵalysty keptelister bolmaıtyndaı etip uıymdastyrýy kerek», - dep atap ótti ol.
Onyń sózine qaraǵanda, 22 naýryz kúni «Qazaq eli» monýmentiniń aldyna 23 myńǵa jýyq halyq jınalady.
Osy kúni tańerteńgi saǵat 8-den merekelik sharalar tolyǵymen aıaqtalǵanǵa deıin kólik quraldary úshin myna kósheler jabyq bolady: R.Qoshqarbaev kóshesinen bastap (Saraıshyq k-si) J.Nájimeden (№42 kóshe) kóshesine deıingi - Táýelsizdik kóshesi; B.Momyshuly kóshesinen bastap №39-shy kóshege deıingi - Baıtursynov kóshesi; M1 kópirinen №39-shy kóshege deıingi - Saraıshyq kóshesi; M3 kópirinen №39-shy kóshege deıingi Syǵanaq kóshesi.
Jol polıtsııasy basqarmasy merekelik sharalar ótý barysynda elorda turǵyndary men qonaqtaryna Orynbor kóshesi arqyly aınalma joldy paıdalanýǵa keńes berdi. Sondaı-aq, «Qazaq eli» monýmentiniń aldynda avtoturaqta orynnyń azdyǵyna baılanysty jáne kólik keptelisteriniń aldyn alý maqsatynda, meımandarǵa alańǵa qoǵamdyq kólikpen jetý usynysy jasaldy.
Mereke kúnderi elorda joldaryndaǵy jol qaýipsizdigin barlyǵy 400-ge jýyq polıtseı qamtamasyz etetin bolady.
