Astanada Naýryz meıramy qalaı ótedi
ASTANA. QazAqparat - Astanada Naýryz meıramyna oraılastyrylǵan sharalar 5 alańda jáne 10 turǵyn alabynda uıymdastyrylady, dep habarlaıdy qalalyq ákimdiktiń baspasóz qyzmeti.
21-23 naýryzda «Han Shatyr» SOSO janyndaǵy alańda úlken etnoaýyl ashylady. Munda 19 kıiz úı tigiledi, shyǵys bazary, saýda oryndary, altybaqan ornatylady.
Árbir kıiz úıdiń janynda Astana qalasynyń teatrlarynyń artısterimen, etnomádenı birlestikterdiń ókilderimen qazaq halqynyń salt-dástúrleri kórsetiledi. Saýda oryndarynda ystyq shyǵys taǵamdary satylady. Shyǵys bazarynyń aýmaǵynda kórme-saýda uıymdastyrylady, qolóner sheberleri sándik qoldanbaly óner buıymdaryn jasaýdy úıretedi.
Elorda turǵyndary men qonaqtaryna baýyrsaq pen Naýryz kóje usynylady.
Sonymen qatar, Astananyń jetekshi shyǵarmashylyq ujymdarynyń kontsertteri ótedi. Atap aıtqanda, «Qorqyt» dástúrli mýzyka ansambli, «Saryarqa» halyq aspaptary ansambli, Astana qalasynyń qýyrshaq teatry, Astana qalasynyń mmemlekettik akademııalyq fılarmonııasynyń solısteri jáne qazaqstandyq estrada juldyzdary óz ónerlerin ortaǵa salady.
Budan basqa, jınalǵan qaýym qazaqsha kúres, arqan tartys, gir kóterý, qoı kóterý syndy sporttyq jarystarǵa qatysa alady. Sondaı-aq, Naýryz meıramyn merekeleý aıasynda ıtter jarysy men tóbet jáne tazylar kórmesi ótkiziledi.
21 jáne 22 naýryzda merekelik baǵdarlama «Qazaq eli» monýmentiniń aldyndaǵy alańda («Shabyt» QUÓÝ janynda), qalalyq ákimdiktiń janyndaǵy alańda, Stýdenttik saıabaqta («Qazaqstan» sportkesheniniń aýmaǵy) jáne «Jastar» teatrynyń aldyndaǵy aýmaqta (vokzal aýdany) uıymdastyrylady. Naýryz meıramyna arnalǵan halyqtyq serýender ótetin barlyq alańdarda kıiz úıler tigiledi, altybaqandar ornatylady, sporttyq jarystar men qazaqstandyq estrada oryndaýshylarynyń qatysýymen kontsertter ótedi, qonaqtarǵa baýyrsaq pen Naýryz kóje usynylady.
Kıiz úılerde qazaq halqynyń «Bata berý», «Tusaýkeser», «Aıtys», «Ulttyq oıyndar», «Betashar», «Kórisý-amandasý», «Besikke salý», «At qoıý» syndy dástúrleri kórsetiledi.
Astananyń shet aýmaqtarynda da merekelik sharalar uıymdastyrylady. Naýryzdyń 18-i men 22-si aralyǵynda Naýryzǵa oraılastyrylǵan kontsertter men sharalar Jeleznodorojnyı, Promyshlennyı, Internatsıonalnyı, Kúıgenjar, Mıchýrıno, Prıgorodnyı, Ilınka, Kóktal-1, Kóktal-2 jáne Óndiris turǵyn alaptarynda ótedi.
19 naýryzda saǵat 15:00 - 17:00 «Alaý» muz saraıynda «Asyq Party» asyq atý jarysy ótedi.
