Astanada Naýryz meıramy zamanaýı tehnologııalarmen ushtasty
ASTANA. KAZINFORM – Búgin Saryarqa aýdanynyń qalalyq alańy naǵyz merekelik dýmannyń oshaǵyna aınaldy.
Bıylǵy Naýryznama onkúndigi aıasynda uıymdastyrylǵan bul sharanyń sıpaty múldem bólek.
Memleket basshysy jarııalaǵan tsıfrlandyrý jylymen jáne jasandy ıntellektini damytý josparymen ushtastyryldy. Munda ata-babamyzdan qalǵan asyl mura men bolashaqtyń tehnologııalary bir arnada toǵysqan. Bul sharalar tek merekelik dýman ǵana emes, sonymen qatar elordanyń ınnovatsııalyq áleýetin kórsetýdiń mańyzdy alańyna aınaldy.
Búgin aspan ashyq, kún raıy da qala turǵyndarynyń serýendeýine qolaıly bolyp tur. Alańnyń ár buryshynan estilgen áýezdi áýen men jurttyń shat kúlkisi kóktemniń naǵyz tynysyn sezdiredi.
Alańǵa aıaq basqan boıda bıiktigi 10 metrlik «Saryarqa áje» músini kórinedi. Orta ǵasyrlyq stılde bezendirilgen bul alyp fıgýra merekelik alańnyń basty sımvoly ispetti. Músin aınalasyndaǵy tematıkalyq bezendirýler men ulttyq naqyshtaǵy dekoratsııalar kelgen qonaqtardy birden baýrap alady.
Merekeniń kórki, kelýshilerdiń qarasy qalyń nysan — ishinde jasandy ıntellekti kómegimen jasalǵan JI-avatarlar men fotokabına ornatylǵan kıiz úı boldy. Munda JI-avatarlar arqyly kez kelgen adam ekran aldynda turyp, vırtýaldy túrde ártúrli ulttyq kıimder men keıipkerlerdiń beınesin kıip kóre alady.
Sonymen qatar kıiz úıdiń tórinde gýmanoıd-robottardyń óneri qyzyp jatyr. Kesteli shapan kıip alyp, myń burala «qara jorǵa» bılegen temir adamnyń qımyly jınalǵan jurtty tańdaı qaqtyrdy. Demeýshilermen birlese ornatylǵan bul robottar búgingi robototehnıkanyń álemdik deńgeıdegi múmkindikterin pash etti. Tipti dástúrli sadaq atýdyń ózi bul jerde tsıfrlyq formatqa kóshken. Nysana retinde teledıdar ekrandary qoldanylyp, jastar mergendigin vırtýaldy jebemen synap jatyr.
Al alańdaǵy VR-zonanyń aldyndaǵy kezek taýsylar emes. Arnaıy kózildirik kıgen búldirshinderdiń kóńili kóterińki. Olar vırtýaldy shyndyq arqyly qııal-ǵajaıyp álemge saıahat jasady. Toǵyz jasar Mıhaıl Hrıpýn esimdi búldirshin óziniń alǵan áserin bylaı jetkizdi:
— Maǵan VR oıyndar óte qatty unady. Ol jaqta dınozavrlardy, men aıdaharlardy kórdim. Jylandar men qustar da boldy, bári dál qasymda turǵandaı shyn sııaqty kórinedi, — deıdi ol.
Balalar vırtýaldy oıynnan shyǵyp, dereý alańdaǵy fotokabınalarǵa qaraı júgirdi. Onda otbasymen, dostarymen birge túrli-tústi estelik sýretterge túsip, máre-sáre bolyp júr.
Naýryzdyń eń basty nyshany — keń dastarhan men dámdi as. Alańnyń bir bóliginde merekelik saýda qyzyp tur. Saryarqa aýdanynyń úzdik kafe-meıramhanalary munda óz ónimderin usynyp jatyr. Úlken qazandarda burq-sarq qaınap jatqan naýryz kójeniń ıisi búkil alańdy alyp ketken. Bul jerde ojaýmen sapyrylǵan kóje kelgen qonaqtarǵa taratyldy. Sondaı-aq bal baýyrsaq pen shelpek, ulttyq desertter jent pen qurttyń túr-túri munda molynan.
Merekelik serýenge shyqqan Stanıslav pen Zarına esimdi turǵyndar uıymdastyrý deńgeıine rıza ekenin aıtady:
— Barshańyzdy merekemen quttyqtaımyz! Alańdaǵy kóńil-kúı keremet, uıymdastyrý óte joǵary deńgeıde. Adam kóp bolǵanyna qaramastan, bári kóńildi. Biz de úıden baýyrsaq, shelpek pisirip, et asyp, qonaq kútýge daıyndaldyq. Mundaı merekelik sharalar men jármeńkeler kóńil-kúıdi kóteredi, — deıdi olar.
Sonymen birge alańnyń ortalyq sahnasynda kontserttik baǵdarlama bastaldy. «Melomen» toby, Zarına Omarova, Jaskeldi Maıasarov, «Zaman» toby men Mereke Kenjeǵulov sııaqty elimizdiń tanymal óner ıeleri án shyrqap, jurtty bıge shaqyrdy. Halyq sahna aldynda ánge qosylyp, máre-sáre bolyp jatyr.
Merekeniń sporttyq aımaǵynda naǵyz qyzý tartys júrip jatyr. Qol kúres pen gir tasyn kóterýden uıymdastyrylǵan saıystarǵa kez kelgen qala turǵyny qatysa alady. Myqtylardyń arasyndaǵy báseke ońaı emes, sebebi jeńimpazdardy baǵaly syılyqtardan turmystyq tehnıkalar kútip tur. Kúsh synasqan jigitterdiń bilegi men jigerin kórgen jurt dýyldap, olarǵa qoldaý kórsetip jatyr.
Saryarqa alańyndaǵy bul mereke dástúr men zamanaýı tehnologııanyń qalaı úndesetinin pash etti. Robottar men JI-avatarlar qazaqtyń qonaqjaılylyǵymen ushtasqanda, Naýryz meıramy múldem jańa qyrynan ashyldy. Merekelik dýman keshke deıin jalǵasady, al alańdaǵy halyqtyń qarasy azaıar emes.
Aıta keteıik, Memleket basshysy qazaqstandyqtardy Naýryz meıramymen quttyqtap, Ulystyń uly kúni tazalyq fılosofııasyn keńinen dáripteý mańyzdy ekenin atap ótken bolatyn.
Buǵan deıin Áz-Naýryz Qytaıda qalaı toılanatynyn jazǵan edik.
