Astanada Naýryz merekesine arnalǵan aýqymdy is-sharalar ótip jatyr
ASTANA. KAZINFORM — Elordada 21-22 naýryz kúnderi qalanyń alty aýdanyndaǵy barlyq ashyq alańda, onyń ishinde eldi mekenderde Naýryz meıramyna arnalǵan merekelik sharalar ótip jatyr. Bul týraly Astana ákimdiginiń baspasóz qyzmeti habarlady.
Qalalyq alańda (elorda ákimdigi ǵımaratynyń aldynda), «Qazaq eli» jáne «Báıterek» monýmentteri alańdarynda, «Astana Arena» stadıony men EKSPO alańynyń aýmaǵynda tańerteńnen bastap merekelik ánder oınalyp, qolóner jármeńkeleri ashylyp, dástúrli taǵamdar daıyndalýda, sol sııaqty ulttyq sport túrlerinen jarystar ótip, júldegerler baǵaly syılyqtarmen marapattalyp jatyr. Qatysýshylar gir kóterý, qol kúresi, arqan tartý, asyq atý, qazaqsha kúres, qoı kóterý, t.b. synǵa túsip jatyr.
Alty aýdanda da kıiz úıler tigilip, merekelik jármeńkeler uıymdastyryldy. Ótetin oryndarda qazaqstandyq estrada juldyzdary men qalalyq orkestrler óner kórsetedi. Olardyń qatarynda Qanat Úmbetov, Abaı Begeı, Álisher Kárimov, Aıdar Baıdildın, «Altyn» trıosy, «Art dombyra» toby, Mádı Qadyrov, Ǵalymjan Joldasbaı, Nurken ıAkııaev, Melomen, Jaqsykeldi Maıasarov, «Qazaqııa» dýeti, Áıgerim Mamyrova, Keńes Álimjan, Ǵadilbek Janaı, Marjan Arapbaeva, Nurlan men Murat, Ashat Tarǵyn, Aıgúl Imanbaeva, «Altyn» etno ansambli, DıArt, Báıterek toptary, Ernar Jumataev jáne t.b. bar.
Túrli-tústi fotoaımaqtar uıymdastyrylyp, altybaqandar ornatyldy.
21 naýryz kúni saǵat 11.00-den bastap Esil aýdanynda «Báıterek» monýmentinde merekelik sharalar bastalyp, ulttyq sport túrlerinen jarystar ótip jatyr, saǵat 13.00-de kontserttik baǵdarlama bastalady.
Saǵat 11:00-den bastap EKSPO alańynda ulttyq sport túrlerinen jarystar, qolóner jármeńkesi men merekelik saýda-sattyq ótedi. 14:00-de kontsert bastalady.
Saryarqa aýdanyndaǵy qalalyq alańda merekelik sharalar ótýde. Aýmaqta segiz kıiz úı tigilip, saǵat 11:00-den bastap elordalyq qonaqtar ulttyq qolónermen tanysyp, ulttyq taǵamdar satyp alatyn dástúrli ónimderdiń jármeńkesi kútip tur. Ulttyq sport túrlerinen de jarystar ótip jatyr, al saǵat 13:00-de astanalyq ónerpazdardyń qatysýymen merekelik kontsert bastaldy.
Baıqońyr aýdanynda saǵat 12:00-de Atatúrik saıabaǵynda ulttyq sport túrlerinen jarys bastaldy: qazaq kúresi, arqan tartý, gir kóterý, asyq atý, qoı kóterý, t.b. Áz-Naýryz merekesine arnaıy fotoaımaq ta uıymdastyrylǵan. Saǵat 13:00-den bastap juldyzdardyń qatysýymen merekelik kontserttik baǵdarlama bolady.
Sondaı-aq, 12:00-de Jazýshylar alleıasynda (Abaı dańǵyly men Sembınov kóshesiniń qıylysy) merekelik kontsert bastaldy.
Saraıshyq aýdanynda saǵat 13:00-den bastap «Qazaq eli» monýmenti janyndaǵy alańda merekelik shara kontserttik baǵdarlamamen jalǵasady, sol sııaqty ulttyq sport túrlerinen jarystar, qolónershiler jármeńkesi men merekelik saýda ótedi.
Almaty aýdanynda merekelik sharalar saǵat 11:00-de Táýelsizdik dańǵylynda ornalasqan Ál-Farabı atyndaǵy Oqýshylar saraıynyń aýmaǵynda bastaldy. Tańerteń ulttyq sport túrlerinen jarystar, qolóner jármeńkesi, merekelik saýda uıymdastyrylady. Saǵat 13:00-den bastap ónerpazdardyń qatysýymen kontsert ótedi.
Nura aýdanynda merekelik sharalar 20 naýryzda bastaldy. 21 naýryz saǵat 11.00-den bastap «Astana Arena» stadıony aldyndaǵy alańda qolónershilerdiń saýda oryndary ashylyp, ulttyq sport túrlerinen jarystar ótip jatyr. Este qalarlyq fotosýretter úshin bul jerde búrkitshiler, tazylar, túıeler men sáıgúlikter bar, sondaı-aq taqyryptyq fotoaımaqtar uıymdastyrylǵan. Sonymen qatar, kıiz úıler men kartınalar kórmege qoıylyp, saǵat 13.00-de kontserttik baǵdarlamamen jalǵasty.
Eske salaıyq, 14 naýryzdan bastap Qazaqstanda Naýryz meıramyn toılaýǵa arnalǵan Naýryznama onkúndigi ótip jatyr. Osy 10 kún ishinde Astanada merekege oraı 200-den astam aýqymdy is-shara – kontsertter, kórmeler, qoıylymdar, shyǵarmashylyq keshter jáne t.b. ótedi.
Aıta ketelik Memleket basshysy Qazaqstan halqyn Naýryz meıramymen quttyqtaǵan edi.