Astanada nasybaı óndiretin jerasty tsehy joıyldy
ASTANA. KAZINFORM - Astanada quqyq qorǵaý organdarynyń qyzmetkerleri reıd barysynda 2 tonnadan astam nasybaı ónimin tárkiledi, dep habarlaıdy elorda ákimdiginiń resmı saıty.
Astanada tyıym salynǵan temeki qospasymen belsendi kúres júrip jatyr. Elordanyń barlyq aýdanynda veıp pen nasybaıdyń zańsyz taralýy men qoldanylýyn anyqtaý boıynsha reıdter júrgizilýde.
Polıtseıler saýda oryndaryn tekserip, taratýshylardy ákimshilik jaýapkershilikke tartty. Reıdtik is-sharalar aptalyǵynda elordanyń bes aýdanynda 500-den astam saýda orny tekserildi.
Polıtsııa departamentiniń qyzmetkerleri aýdan ákimdikterimen birlesip, shegilmeıtin temeki ónimderin satýdyń 70-ke jýyq faktisin, onyń ishinde nasybaı óndirisi boıynsha jerasty tsehtaryn anyqtady.
Reıd barysynda Baıqońyr aýdanynda polıtsııa qyzmetkerleri nasybaı óndiretin tsehty tapty. Tárkilengen zańsyz ónimniń jalpy somasy 10 mln teńgeden asady.
Astana qalasy polıtsııa departamentiniń qyzmetkerleri reıd barysynda Omarov jáne Asan Qaıǵy kósheleriniń qıylysyndaǵy jer úıde 2 tonna nasybaı saqtalǵanyn anyqtady.
Nátıjesinde zań buzýshylarǵa 25 aılyq eseptik kórsetkish (AEK) mólsherinde aıyppul salý túrinde ákimshilik quqyq buzýshylyq týraly kodekstiń (ÁQBtK) 196-babyna sáıkes ákimshilik jaýapkershilikke tartyldy. Barlyq ónimder tárkilendi.
Elordanyń saýda oryndary boıynsha reıdter kún saıyn júrip jatyr.
