Astanada nashar estıtin balalardyń kontserti ótti
ASTANA. QazAqparat - Búgin Astanada M. Gorkıı atyndaǵy orys drama teatrynda «Kún Álemi - Solnechnyı krýg» atty nashar estıtin balalar shyǵarmashylyǵynyń festıvali bolyp ótti.
Ol jýyrda Oral qalasynda ótetin Delfıı oıyndary aıasynda uıymdastyrylyp otyr. Ulttyq Delfıı komıtetiniń atqarýshy dırektory Sajıda Saıtbaevanyń aıtýynsha, jobanyń tujyrymdamasy áleýmettik jaǵynan qorǵalmaǵan toptaǵy balalarǵa óner arqyly is júzinde kómek berýge saıady.
«Balalarǵa úsh kún boıy elimizge tanymal mádenıet qaıratkerderi akterlik sheberlik, vokal jáne horeografııa sııaqty baǵyttar boıynsha sheberlik saǵattaryn ótkizgen bolatyn. Úsh baǵyttyń úsheýiniń de is júzinde mańyzy zor. Olar balany shyǵarmashylyq turǵydan damytyp, onyń dúnıetanymy men shyǵarmashylyq áleýetiniń kókjıegin keńeıtedi», - dep atap ótti ol.
Festıvaldiń maqsat etken toby retinde estý qabileti shekteýli balalar tańdaldy. Bul balalar toby Astana qalasyndaǵy №65 ınklıýzıvti mektepte bilim alady.
«Boılaryndaǵy kemshilikke qaramastan, bul toptyń balalary óte belsendi, damýǵa jáne álemdi tanýǵa talpynady. Sheberlik saǵattarynyń júıesi balalardyń qyzyǵýshylyqtary men damý erekshelikteri eskerile otyryp jasalǵan. Balalar úsh topqa bólindi. Kishi top horeografııadan, ortanshy top akterlik sheberlik, úlken top vokaldan sabaq aldy», - deıdi S. Saıtbaeva.
