Astanada Nartaı Bekejanuly atyndaǵy jyrshylar baıqaýy ótýde

Bul óner jarysyn QR Mádenıet jáne aqparat, Bilim jáne ǵylym mınıs­tr­likteri, Qyzylorda oblysy Shıeli aýdanynyń ákimdigi, Astanadaǵy Qazaq ulttyq óner ýnı­versıteti, Qorqyt atyndaǵy ónertaný ǵylymı-zertteý ınstıtýty uıymdastyryp otyr.

Elbasy N.Á.Nazarbaevtyń qadaǵalaýymen dáıekti túrde júzege asyrylyp kele jatqan «Mádenı mura» baǵdarlamasy aıasynda ótkizilgeli otyrǵan úlken sharanyń maqsaty - HH ǵasyrdaǵy qazaq óneri men mádenıetiniń asa kórnekti ókili - maıtalman ónerpaz: ánshi, jyrshy, aqyn, sazger Nartaı Bekejanulynyń (1890 - 1954) ózindik erekshe shyǵar­ma­shy­lyǵyn res­pýb­lı­ka­lyq deńgeıde nasıhattaý, jas urpaqtyń ulttyq dástúrli ónerge yn­ta-yqylasyna serpin berý, Nartaıdyń azamattyq, ónerpazdyq biregeı tulǵasyn tanyta túsý.

Baıqaý baǵdarlamasynyń talabyna sáıkes árbir qatysýshy Nartaı Bekejanulynyń alty áni men shyǵarmasyn oryndaýy tıis. Nartaı Bekejanulynyń zamandastary: Taıjan, Shashýbaı, Maıra, Kenen aqynnyń ozyq án úlgilerin syrnaı men dombyrada oryndaý konkýrs talaptaryna saı teń dárejede baǵalanady.

Nartaı óziniń aldyndaǵy aǵa býyn Budabaı Qabyluly jáne týǵan aǵasy Mánsúr aqyndardy úlgi, ustaz tutqan. On jeti jasynan jyr tógip, án salǵan. Nartaı mektebi shákirt­teriniń aıtý máneri kúlli qazaq arasynda ózgeshe, ony eshkimmen de shatastyra almaısyz.

Nartaı 1890 jyly Syr elinde - osy kúngi Qyzylorda oblysynyń Shıeli aýdanynda Qara­taýdyń biter tusyna jaqyn Bestam jerinde dúnıe­ge kelgen.

Nartaı jasynda Syr súleıleri Balqy Bazar, Áýbákir Kerderi, Murat Móńkeuly, Kete Júsip, Qańly Júsip, Budabaı, aǵasy Mánsúr óleń-jyrlaryn jattap ósken. Kórshi Ulytaýdan Syr boıyna qydyryp kelgen Taıjan aqynnan bata alǵan. Jastaıynan ónerpazdyq dabysy aımaqqa tarap, áıgili ánshi, aıtysker, seri aqyn atanady.

Nartaı shyǵarmashylyǵynyń eń bir sharyq­taǵan kezi ótken ǵasyrdyń otyzynshy-qyr­qynshy jyldary dep aıtýǵa bolady. Bul kezeńde respýblıkalyq deńgeıde uıymdastyrylǵan óner saıys sharalary Nartaıdyń qatysýynsyz ótpe­gen.

Aqyn-sazgerdiń «Nartaı áni», «Ózderiń biler Nartaımyn», «Altyn kókem», «Tolqyn», «Ser­pin», «Bazarym ótip bara ma?», «Beıbitshilik», «Jeńis jyry», «Jasa, Qazaqstanym!» sııaqty syrly da sıqyrly, júrek tebirenterlik, qulaq­qa jaǵymdy talaı án-jyrlary bar. Ókinishke qaraı, onyń án-jyr, aıtystarynyń birde-biri óz aýzynan, óz únimen ne kúıtabaqqa, ne úntas­paǵa jazylyp alynbaǵan. Zamana bulbuly hám dúldúli Nartaı 1954 jyly 64 jasynda naýqastan qaıtys bolady. Zıraty týǵan aýylynda, basyna úlken kesene turǵyzylǵan.