Astanada nárestesin qoqys jáshigine tastaǵan kámelettik jasqa tolmaǵan qyz sottaldy
ASTANA. QazAqparat - Astana qalasynyń aýdanaralyq kámelet jasyna tolmaǵandar isteri jónindegi mamandandyrylǵan sotynyń úkimimen nárestesin qoqys jáshigine tastap ketken jas qyz sottaldy. Bul týraly Astana qalasy Almaty aýdanynyń prokýratýrasy habarlady.
Prokýratýranyń jazýynsha, 2013 jyldyń tamyz aıynda kámelettik jasqa tolmaǵan, 1998 jyly týylǵan Atyraý oblysynyń týmasy, azamatsha R. Astana qalasynda ornalasqan kolledjderdiń birine oqýǵa túsedi.
2014 jyldyń sáýir aıynyń 9-nan 10-na qaraǵan túni, saǵat shamamen 02:00 ýaqytta azamatsha R. jaldamaly páterdiń jýynatyn bólmesinde eshkimniń kómeginsiz ózi bosanyp, deni saý qyz balany dúnıege ákeledi. Sosyn náresteni kók tústi poletılen paketke salyp, aýa raıynyń salqyndyǵyna qaramastan, ózi turyp jatqan turǵyn úı aýlasyndaǵy qoqys jáshigine tastaǵan.
Alaıda saǵat 03:00 shamasynda sol mańnan ótip bara jatqan erli-zaıypty azamattar qoqys jáshiginiń ishinen náresteniń jylaǵan daýysyn estip qalady. Olar dereý balany úılerine aparyp, jedel medıtsınalyq járdem, polıtsııa qyzmetkerlerin shaqyrady. Osylaısha sábı Astana qalasynda ornalasqan №1 balalar aýrýhanasyna jetkizilgen. Aýrýhana qyzmetkerleri sábıge balany taýyp alǵan jubaılardyń tegin berdi.
Atalǵan derek boıynsha qozǵalǵan qylmystyq is Astana qalasy Almaty aýdandyq prokýratýrasymen baqylaýǵa alynyp, negizinen qaraý úshin aǵymdaǵy jyldyń qyrkúıek aıynda sotqa joldanǵan.
Qazannyń 8-inde Astana qalasynyń aýdanaralyq kámelet jasyna tolmaǵandar isteri jónindegi mamandandyrylǵan sotynyń úkimimen azamatsha R. QR QK-niń 119-babynyń 1-bólimimen aıypty dep tanylyp, balanyń ómirine qaýip tónbegeni jáne qylmyskerdiń kámeletke tolmaǵany eskerile otyryp, 1 jyl merzimge bas bostandyǵyn shekteý jazasyna kesildi.
