Astanada «Napoleon. Ómir. Ańyz» atty kórme ashyldy

Kórmege 300-ge jýyq jádiger, onyń ishinde óner týyndylary, qoljazbalar men Napoleon dáýiriniń jıhazdary qoıylǵan. Olardyń barlyǵy sol kezdegi Frantsııanyń shyǵarmashylyq, ǵylymı jáne saıası ómir saltynan syr shertip, sondaı-aq, frantsýz ımperatory kezindegi azamattyq qoǵamdaǵy ózgeristerdi kórsetedi.

Kórme Frantsııanyń Qazaqstandaǵy jylynyń qorytyndy sharasy retinde uıymdastyrylyp otyr. Uıymdastyrýshylar qazaqstandyq kórermenge Parıjden arnaıy ákelingen Frantsııanyń baǵa jetpes mádenı qazynalaryn tamashalaýǵa múmkindik berip otyr.

«Bul zattardyń barlyǵy Napoleonnyń jeke buıymdary, ol olardy óz qolymen ustaǵan, kúndelikti ómirinde qoldanǵan. Bul kórme sonysymen de qundy. Bir ókinishtisi onyń daýysynyń jazbasy joq. Napoleon tek ańyzǵa aınalǵan tulǵa ǵana emes, eń bastysy et pen súıekten jaratylǵan qarapaım adam bolǵan», - dep atap ótti Frantsııanyń Qazaqstandaǵy Tótenshe jáne Ókiletti Elshisi Fransıs Eten kórmeniń ashylýyna baılanysty ótken baspasóz máslıhatynda.

«300 jádigerden turatyn kórme Napoleon qory, Versal, Fontenblo jáne Malmezon qalasyndaǵy Napoleonnyń Jozefınamen turǵan úıi sııaqty murajaılardan jınalǵan. Biz osy kórmeniń dál Astanada ashylǵanyna óte qýanyshtymyz», - dedi kórme kýratory, «Napoleon» qorynyń dırektory Terrı Lents.

Aıta ketý kerek, kórmeni Ulttyq murajaılar birlestigi - Úlken saraı jáne «Napoleon» qoǵamdyq qory Frantsııanyń Qazaqstandaǵy Elshiliginiń bastamasymen, Astana qalasy ákimdiginiń qoldaýymen uıymdastyryp otyr.

Kórme 23 aqpanǵa deıin sozylady. Oǵan kelem deýshilerge 21 jeltoqsannan bastap esik ashyq.