Astanada «Napoleon. Ómir, ańyz» atty biregeı kórmeni 6 myńǵa jýyq adam tamashalady
ASTANA. QazAqparat - Táýelsizdik saraıynda ótip jatqan «Napoleon. Ómir, ańyz» biregeı ekspozıtsııasy elorda turǵyndary men qonaqtarynyń qyzyǵýshylyǵyn týdyrdy.
Osy ýaqytqa deıin kórmeni 6 myńǵa jýyq adam tamashalaǵan. Bul týraly astana.kz saıtyna Táýelsizdik saraıynyń baspasóz qyzmetinen habarlady.
«Napoleon. Ómir, ańyz» ekspozıtsııasy Ulttyq Murajaı jáne Úlken Saraıy Birlestigi, sondaı-aq Qazaqstandaǵy Frantsııa Elshiliginiń bastamasymen Napoleon qory jáne Astana qalasynyń Ákimdiginiń qoldaýymen Qazaqstandaǵy Frantsııa jylynyń aıasynda uıymdastyrylyp otyr. Atalǵan is-shara 19 jeltoqsanda ashyldy.
Kórme Frantsııa men Eýropanyń tarıhı tulǵasy Napoleonnyń ómiri men qyzmetine arnalǵan. Onda sol kezeńniń shyǵarmashylyq, ǵylymı jáne saıası ǵumyryn, sonymen qatar, Napoleon dáýirindegi azamattyq qoǵam ózgeristerin kórsetý maqsatynda Napoleon dáýiri kezinen saqtalǵan shamamen 300 kórme eksponaty, óner týyndylary, qoljazba men jıhaz zattary qoıylǵan.
Ekskýrsııa qazaq, orys jáne aǵylshyn tilderinde ótkiziledi. Qazirgi ýaqytta kórmeni Astanadaǵy túrli dıplomatııalyq ókildikterdiń ýákilderi tamashalady.
Kórme 23 aqpanǵa deıin jalǵasady.
