Astanada nanotehnologııalar negizinde jasalǵan biregeı saýyqtyrý ónimi tanystyryldy (FOTO)
ASTANA. QazAqparat - Astanadaǵy «Kongress Holl» saraıynda ótip jatqan «Kúzgi syılyq» kórme-jármeńkesinde malaızııalyq «Nano Patch BHD SDN» kompanııasynyń qazaqstandyq ókildigi nanotehnologııalar negizinde jasalǵan biregeı saýyqtyrý ónimin tanystyrdy.
«Bizdiń negizgi ónimimiz - «Nano Patch plus» plastyriniń basty ereksheligi onyń asqazan-ishek joldaryn aınalyp ótip, dárýmender men mıneraldardy týra qanǵa aparatyndyǵynda. Bul turǵyda adam densaýlyǵy jasýsha deńgeıinde qalpyna keledi», - dep atap ótti «Nano Patch plus» ókili Aına Nysanbaeva.
Onyń aıtýynsha, dástúrli bulshyqetke jáne tamyrǵa egiletin ekpelerden qaraǵanda, plastyr táýlik boıy qyzmet etip, paıdaly zattardy adam aǵzasyna úzdiksiz jetkizip turady. Atalǵan zattarmen qatar kompanııa energetıkalyq boıtumarlar men kosmetıkalardy da shyǵarady. Al kompanııanyń barlyq dárilik preparattary AQSh-ta, Japonııa men Frantsııada jasalady.
Aıta keteıik, AQSh nanotehnologııalar boıynsha álemdik naryqta birinshi orynda (27%) tur, odan keıingi orynda Japonııa (24%), Germanııa, Ulybrıtanııa jáne Frantsııa (25%). Qalǵan 24%-dy Qytaı, Reseı, Ońtústik Koreıa, kanada jáne Avstralııa syndy elder bólisip alady.
Qazaqstanda da nanotehnologııa salasynda zertteýler júrgizilýde. Olardy QR Ulttyq ǵylym akademııasy baqylaıdy.
