Astanada nan baǵasy qymbattamaıdy
ASTANA. 18 qazan. QazAqparat - Elordada nan men unnyń baǵasy qymbattamaıdy. Kúzde jınalǵan altyn dán respýblıkany astyqpen qamtýǵa jetkilikti. Elordanyń resmı saıtynyń málimetinshe, bul týraly Astana qalasynyń Aýyl sharýashylyǵy basqarmasynyń bastyǵy Murat Dalabaev málim etti.
Osy jyly el Úkimetiniń Turaqtandyrma qorynan Astana qalasyna úshinshi surypty 57900 tonna (aıyna 4825 tonna) astyq bólingen.
«Qazirgi ýaqytta nan baǵasy sharyqtap ketpes úshin Úkimet tarapynan shara qoldanylýda. Elimizdiń Turaqtandyrma qorynan 1,3 mlrd tonna astyq bólindi. Bul degenimiz, 2012 jyldyń tamyzynan 2013 jyldyń tamyzyna deıin baǵa bir qalypta bolady degen sóz. Demek, Astana turǵyndaryna alańdaýǵa negiz joq», deıdi M. Dalabaev.
Nan men un baǵasyn turaqtandyrý úshin qala ákimdigi 5 bıdaı óndiretin kásiporynmen, 30 naýbaıhana jáne 17 qoǵamdyq saýda oryndarymen memorandým jasasqan. Memorandýmǵa sáıkes nan baǵasy 50 teńgeden aspaýy kerek. Sonymen, ázirge Astana qalasy boıynsha formaly nan - 50 teńge, birinshi surypty un - 86 teńge. Al joǵary surypty un 114 teńgeden 134 teńgege kóterilgen.
