Astanada naǵyz qazaqy shapandardyń úlgisin tanystyrýǵa arnalǵan kórme ashyldy (FOTO)
ASTANA. QazAqparat - Búgin Astanadaǵy QR Tuńǵysh Prezıdentiniń Mýzeıinde shyǵarmashyl jastardyń HV Respýblıkalyq «Jiger» festıvali syılyǵynyń ıegeri, Qazaqstan Sýretshiler odaǵynyń múshesi Aıjan Ábdýbaıttiń «Ǵasyrlardyń altyn órnegi» atty jeke kórmesi ashyldy.
Atap aıtqanda, sheber búginde biregeı shyǵarmashylyǵymen tanylyp otyr. Ol tarıh qoınaýynda qalǵan ǵasyrlardyń kıimderi men turmystyq zattaryn qalpyna keltiredi jáne qaıta jańǵyrtýmen tabysty aınalysyp júr. Kóne «zerleý» tehnıkasymen toı jáne ulttyq kıimderdi tigedi. Avtordyń sózine qaraǵanda, kestelep toqýdyń tamyry tereńde jatyr. Qazaq halqy bul kórkem ádispen saltanatty kıimderdi, bas kıimderdi, turmystyq zattardy áshekeılegen.
QR Sýretshiler odaǵynyń múshesi, tarıh ǵylymdarynyń kandıdaty Qalıolla Ahmetjannyń aıtýynsha, altynmen zerlep kesteleý óneri elimizde joǵala bastady.
«Bul óner tek mýzeılerde kóretin týyndylarǵa aınalyp ketti. Aıjan Toıshybekqyzy osy ónerdi qalpyna keltirip, bıik dárejege kóterýge eleýli eńbek sińirdi. Bul ónerdi elıtalyq óner dep aıtsaq, artyq bolmaıdy. Ol bul ónerdi mýzeılerde saqtalǵan týyndylar úlgileriniń negizinde onyń tehıkasyn zerttep, qalpyna keltire aldy», - dedi Q. Ahmetjan.
Osy oraıda ol kórmede kópshilik nazaryna usynylǵan týyndylardyń barlyǵy óte joǵary deńgeıde oryndalǵanyn atap ótti.
«Bizder osy kúnderi bazarlarda saýdalanyp júrgen qazaqtyń kestelengen shapandaryn retinde jalǵan kestelengen zattardy alýdamyz jáne olardy ulttyq dúnıe dep qabyldaýdamyz. Búgingi kórme bizdiń kózqarasymyzdy qaıtadan qalpyna keltirip, shynaıy ónerimizdiń qandaı bolǵanyn túsinýge kómek bolady degen oıdamyn», - dedi Q. Ahmetjan.
Qazaqtyń turmysy men dástúrli kıim-keshekterin etnografııalyq jáne tarıhı turǵyda zertteý A. Ábdýbaıtke tarıhı artefaktilerdiń birtutas bóligin qalpyna kelirýge múmkindik berdi. Olardyń qatarynda, han kıimderiniń jınaǵy, Jáńgir hannyń áskerı kıimi, Fatıma hanshaıymnyń beshpenti, sondaı-aq qazaq aqsúıekteriniń kúndelikti paıdalanatyn zattary qaıta jańǵyrtylǵan.
