Astanada N. Tórequlovqa eskertkish ashý máselesi sheshimin tappaı otyr - Q. Aıtahanov
Depýtattyń aıtýynsha, bıyl kórnekti memleket jáne qoǵam qaıratkeri, qazaqtyń tuńǵysh kásibı dıplomaty, HH ǵasyrdyń 20-30 jyldary Keńester odaǵynyń Saýd Arabııasy Koroldigindegi Ókiletti ókili - Názir Tórequlovtyń týǵanyna 120 jyl, jazyqsyz qurban bolǵanyna 75 jyl tolady. Buǵan oraı, 2007 jyly Názir Tórequlovtyń 115 jyldyǵy qarsańynda, onyń esimin el jadynda máńgi qaldyrý maqsatynda birqatar is-sharalardy atqarýdy ótinip depýtattyq saýal joldaǵanyn eske alǵan Qýanysh Aıtahanuly, birqatar usynystar iske asyrylǵanyn jetkizdi.
Atap aıtqanda, N.Tórequlovtyń ulttyq tarıhymyzdaǵy ádil orny belgilengen. Memleket qaıratkeri Taıyr Mansurovtyń «Elshi Názir Tóreqululynyń Arabııa dastany» atty bes tomdyq kitaby shyǵyp, zııalynyń eńbek-jazbalary jınaqtalyp, ómirbaıany zerttelip, barsha halqymyzǵa jarııa etildi, derekti fılmder túsirilgen. Úkimet qaýlysymen Názir Tórequlovtyń atyndaǵy «Qazaqstan Respýblıkasynyń syrtqy saıasatyna qosqan úlesi úshin» medali bekitildi.
«Degenmen, Bilim jáne ǵylym mınıstrligine Memlekettik qyzmet agenttigimen birge N.Tórequlov atyndaǵy arnaýly stıpendııa taǵaıyndaý múmkindigin qarastyrý, N.Tórequlovqa eskertkish qoıý jáne belgili dıplomattyń esimin Almaty men Astana qalalarynda mektepterge berý máselesi arada 5 jylǵa jýyq ýaqyt ótse de sheshimin tappaı otyr. Táýelsizdik týyn kótergen elimiz úshin ardaqty azamattarymyzdyń esimin qurmetteý biz úshin paryz. Sondyqtan, ústimizdegi jyly Táýelsiz Qazaqstan dıplomatııasynyń 20 jyldyǵyna jáne qazaqtyń tuńǵysh dıplomaty NázirTórequlovtyń 120 jyldyǵyna oraı Astana qalasynda Názir Tórequlovqa eskertkish ornatylsa ıgi. Budan bólek, Qazaqstan Respýblıkasy Prezıdenti janyndaǵy memlekettik basqarý akademııasyndaǵy Dıplomatııa ınstıtýtyna N.Tórequlovtyń esimin berip, úzdik magıstranttarǵa Názir Tórequlovtyń atyndaǵy stıpendııa taǵaıyndaý, Astana jáne Almaty qalalarynda mektepterge Názir Tórequlovtyń esimin berý máseleleri sheshilse eken», - deıdi depýtat.