Astanada N. Nazarbaev týraly «Bitimger» atty jańa kitap tanystyryldy (FOTO)
ASTANA. QazAqparat - Búgin QR Syrtqy ister mınıstrliginde Memleket basshysy Nursultan Nazarbaevtyń Ýkraına daǵdarysyn retteýde sińirgen eńbegi týraly «Bitimger» atty jańa kitaptyń tanystyrylymy ótti. Kitapqa Memleket basshysynyń Maıdanda bolǵan oqıǵalarynan bastap, aqpandaǵy Mınıskide ótken «normand tórttiginiń» kezdesýine deıingi mańyzdy oqıǵalar qamtylǵan.
Kitap avtory - belgili qazaqstandyq dıplomat, QR Prezıdentiniń kómekshisi Nurlan Onjanov. Ol N. Nazarbaevtyń Ýkraınadaǵy daǵdarysty retteý barysynda Frantsııa, Germanııa, Reseı, AQSh, Italııa, Shveıtsarııa, Belarýs jáne Ýkraına basshylarymen kezdesýlerine bastan-aıaq qatysyp, kelissózder barysyn jiti qadaǵalaǵan maman.
«Ýkraına daǵdarysy Qazaqstandy da beı-jaı qaldyrǵan joq. Óıtkeni biz burynnan beri Reseı jáne Ýkraına halqymen tyǵyz baılanystamyz. Bizdiń elimizde ýkraındar men orystar óte kóp. Sondyqtan bul daǵdarys Memleket basshysyn da qatty tolǵandyrdy. Ol daǵdarystyń alǵashqy kúnderinen bastap-aq beıbitshilik pen tatýlyq ornatýdyń joldaryn qarastyrdy», - dep atap ótti QR Syrtqy ister mınıstri Erlan Ydyrysov.
«Barlyq taraptardyń jasap jatqan jumystary men kelissózderine qaramastan, ókinishke qaraı, qazirgi kúnniń ózinde Ýkraınanyń ońtústik-shyǵysynda qaqtyǵystar oryn alyp jatyr, jaǵdaıdyń ýshyǵyp ketýi qaýpi áli de saqtalyp otyr. Budan baıqaıtynymyz - jekelegen adamdardyń qateligi bútindeı bir halyqtardyń tragedııasyna alyp keletini. Qanshama adamdar qurban boldy. Sondaı oqıǵalardan keıin beıbitshilik pen tynyshtyqqa qaıtadan qol jetkizý óte qıyn bolady. Sondyqtan osy kitap dál qazir jaryqqa shyǵyp otyr», - dedi kitap avtory N. Onjanov.
Onyń oıynsha, kitaptaǵy faktiler men naqty detaldar, Ýkraına daǵdarysyna jasalǵan syrtqy kózqaras osy jaǵdaıdan shyǵar jol izdeý protsesine az da bolsa septigin tıgizip, máseleni jańa qyrynan qarastyrýǵa negiz bolýy múmkin.
«Memleket basshysynyń qasynda júrip ol kisiniń osy máseleni sheshý joldaryn talmaı izdep, qyrýar qajyr-qaıratyn jumsaǵanyn óz kózimmen kórdim. Bul kitapta sonyń barlyǵy egjeı-tegjeıli baıandalady», - deıdi avtor.
Aıta keteıik, kitap 5 bólimnen turady, onyń árqaısysynda túrli ýaqyt aralyǵyndaǵy oqıǵalar baıandalady. Kitap qazaq jáne orys tilderinde jaryq kórdi.
