Astanada «Myń bala» jobasy máresine jetti (FOTO)
«Myń bala» - túrli etnıkalyq toptardyń mektep jasyna deıingi balalarǵa jáne mektep oqýshylaryna qazaq tili men mádenı ortasyna boı úıretip, memlekettik tildi meńgerýine, qazaqtyń tarıhy men mádenıetin, salt-dástúrleri men ádet-ǵuryptaryn boıyna sińirý múmkindikterin kózdegen edi. Onyń aıasynda tilderdi jedeldete oqytýdyń «Tildaryn» ádistemesi boıynsha «Sıqyrly qalam» ınnovatsııalyq ádistemelik kesheniniń jáne basqa da ozyq til úıretý quraldarynyń kómegimen túrli etnostyq toptardyń balalaryna memlekettik tildi úıretý qarastyrylǵan bolatyn. Uıymdastyrýshylardyń aıtýyna qaraǵanda, «Myń bala» jobasynyń baǵdarlamasy «mádenı-tildik boı úıretý» halyqaralyq tájirıbesiniń nátıjelerin eskere otyryp qurylǵandyqtan, barlyq qatysýshylardyń mádenı jáne tildik ortaǵa tolyǵymen uıysýyna múmkindik berildi. Respýblıka kóleminde barlyq derlik óńirlerde memlekettik tilde túrli konkýrstar men saıystar júzege asqan. Atap aıtqanda, joba aıasynda Astana jáne Almaty qalalary, oblys ákimdikterimen uıymdastyrylǵan sharalar boıynsha 235 myń 71 bala qatysqan. Qazaq tiline úıretýdiń avtorlyq kýrstary boıynsha 7 myń 863 is shara júzege asty. Tutastaı alǵanda, «Myń bala» jobasy aıasynda 44 myń 497 bala memlekettik tildi erkin ári sapaly meńgerýge qol jetkizip otyr. Táýelsizdik kúni qarsańynda uıymdastyrylyp otyrǵan «Myń bala» jobasyn saltanatty qorytyndylaý sharasy aıasynda Qazaqstan halqy Assambleıasynyń memlekettik tildi jáne etnostar tilderin damytý salasyndaǵy ınnovatsııalyq jańalyqtarynyń kórmesi, «Álem qadirlegen Elbasy» shet memleketterdiń joǵary nagradalarynyń kórmesi, «Qazaqstanda prezıdenttik ınstıtýttyń qalyptasýy men damýy» ınteraktıvtik kórmesi de ótkizilýde. Tutastaı alǵanda, jobanyń nátıjesinde «Myń bala - tatýlyq tiregi!» atty derekti fılm túsirilmek. Budan bólek, jyl saıyn memlekettik tildi erkin meńgerip shyqqan ózge ult ókilderinen turatyn myń mektep oqýshysy - qazaq tilinde erkin sóıleıtinderdiń jáne memlekettik tildi úıretýdi nasıhattaıtyn eriktilerdiń qatarynda bolady. Aıta keteıik, «Myń bala» respýblıkalyq mádenı-aǵartýshylyq jobasyn qorytyndylaý jıyny barysynda «Sheshendik óner», «Kemeńger», «Yntymaǵy jarasqan týǵan ólkem» baǵyttary boıynsha konkýrstardyń jeńimpazdary da marapattaldy.
