Astanada mýzykalyq aspaptar men sport jádigerleriniń ekspozıtsııasy ashyldy
ASTANA. QazAqparat - Búgin Elbasy kitaphanasynyń mýzeı ǵımaratynda Qazaqstan Respýblıkasynyń Táýelsizdik kúnine oraı «Álem halyqtarynyń mýzyka aspaptary», «Qazaqstannyń sporttyq dańqy» atty turaqty tyń ekspozıtsııalardyń ashylý saltanaty ótti, dep habarlaıdy kitaphananyń baspasóz qyzmeti.
Іs-sharany Elbasy kitaphanasy dırektorynyń birinshi orynbasary Ámirhan Rahymjanov ashty.
«Búgingi kúndi túsinip-túısiný úshin de, bolashaqtyń dıdaryn kózge elestetý úshin de keshegi kezeńge kóz jiberýimiz kerek» dep Memleket basshymyz N. Á. Nazarbaev aıtqandaı, men eń aldymen barshańyzdy aldaǵy kele jatqan Qazaqstan Respýblıkasynyń Táýelsizdik kúnimen shyn júrekten quttyqtaımyn!
Búgin kórermen nazaryna Táýelsizdik kúnine oraı Elbasy kitaphanasynyń qor jınaqtarynyń negizinde daıyndalǵan eki úlken turaqty ekspozıtsııalarymyzdy usynyp otyrmyz.
Osy jyldar ishinde bizdiń qor jınaqtarymyz Elbasyna sheteldiń memleket basshylary men túrli qoǵam qaıratkerlerinen tabys etilgen shetelderdegi mýzykalyq aspaptardyń túrleri men álemdik jáne halyqaralyq sporttyq jarystarda atoı salǵan jeńimpazdardyń jádigerlerimen tolyǵa túsken bolatyn. Sonymen qatar bizdiń qorymyzdyń taǵy bir mańyzdylyǵy arqyly sporttyq jetistikterimizge kýá bolatyn tarıhı oqıǵalardy kezeń-kezeńge bólip, osy taqyryptarǵa sáıkes qujattyq, kitaptyq jáne jádigerlik keshen arqyly ekspozıtsııamyzda baıandaýdy jón sanadyq.
Táýelsiz eldiń eń basty tuǵyry - sol memlekettegi jergilikti ulttyń rýhy, jigeri, qoǵamdyq sanasy. Jańa álemdegi jańa Qazaqstannyń búgingi qudiretti kúshi el birliginde, ulttar tatýlyǵynda jatyr dep oılaımyn»,-dedi Ámirhan Muratbekuly.
Mádenı shara barysynda Qazaqstan Geografııalyq qoǵamynyń jáne Qazaqstan Baıkerler qaýymdastyǵynyń prezıdenti, «Dostyq» ordeniniń ıegeri Dmıtrıı Petrýhın, Bokstan halyqaralyq dárejedegi sport sheberi, 2010-2012 jyldary «Astana arlandary» sapynda óner kórsetken bylǵary qolǵap sheberi Mereı Aqshalov jáne QR Memlekettik kúzet qyzmetiniń Prezıdenttik orkestriniń án jáne estrada ansambliniń basshysy, kórkemdik jetekshisi, Qazaqstannyń eńbek sińirgen qaıratkeri, maıor Maral Sahmetova da sóz sóılep, óz oılaryn ortaǵa saldy.
«Qazaqstannyń sporttyq dańqy» turaqty kórmesi Elbasy kitaphanasy men QR Ulttyq Olımpıada komıtetiniń yntymaqtastyq jónindegi memorandýmy aıasynda uıymdastyrylatyn is-sharalar qataryn jalǵastyrady. Olardyń shymyldyǵyn aǵymdaǵy jyldyń mamyr aıynda Elbasy kitaphanasynda ornalasqan «Qazaqstandaǵy Olımpıada qozǵalysy» turaqty kórmesi ashty.
«Álem halyqtarynyń mýzykalyq aspaptary» turaqty kórmesin qurý ıdeıasy «EKSPO-2017» halyqaralyq kórmesiniń aıasynda Mýzeıde uıymdastyrylǵan kórme qonaqtarynyń oń pikiri men qyzyǵýshylyǵynyń nátıjesinde paıda bolǵan. Atalmysh kórme qala turǵyndary men qonaqtarynyń kóńilinen shyǵyp, suranys týdyrdy.
Mýzyka aspaptarynyń jınaǵy Elbasy N.Á. Nazarbaevqa shet memleket pen úkimet basshylarynyń, halyqaralyq uıymdar men qorlardyń, sheteldik delegatsııalardyń, el turǵyndarynyń tartýlarynan turady. Mýzeı jınaǵyndaǵy mýzyka aspaptarynyń kollektsııasyna qarapaıym aspaptardan bastap, qurylymy men mýzykalyq oryndaý múmkindikteri boıynsha asa kúrdeli quraldar da kiredi. Olardyń arasynda úrmeli, shertpeli, ysqyly, urmaly jáne mehanıkalyq syndy mýzyka aspaptardyń barlyq túrleri kezdesedi. Ekspozıtsııaǵa jalpy eseppen 35 jádiger qoıylǵan.
«Azııa oıyndarynyń qarsańynda men Ońtústik-Shyǵys Azııanyń barlyq elderin aralap, olardy bizdiń úlken is-sharaǵa qatysýǵa shaqyrdym. Áli esimde, Fılıppınniń sport mınıstri ózderinde qys bolmaǵandyqtan, qysqy sport túrleriniń joqtyǵynan óz sportshylaryn Eýropa men Reseıge jattyǵýǵa jiberdi, sodan keıin olar bizge Azııa oıyndarynda kelýge múmkindik aldy. Otanym Qazaqstan týraly álemniń ártúrli bólikterinde sóılesken kezimde boıymdy qýanysh pen maqtanysh sezimi kerneıdi. Prezıdent N.A. Nazarbaevtyń arqasynda búkil el biledi. Men qarapaıym jumysshylarmen, jastarmen kezdesip, qazaq jeri týraly aıtyp, óz úlesimdi qosyp kelemin. Shynyn aıtsa, ishki týrızm odan ári damysa deımin. Qazir men Qazaqstandaǵy qasıetti oryndarǵa ekspedıtsııa júrgizip jatyrmyn. 10 eldiń baıkerleri jazǵa qaraı elimizdiń túkpir-túkpkirin aralaıtyn bolady. Sodan keıin álemniń 50 elinen qatysýshylar Balqash kólinde ótetin festıvaldi tamashalaıdy. «Bolashaqqa joldaý» arqyly Qazaqstan dostaryn shaqyratyn bolady»- dep áıgili baıker-saıahatshy Dmıtrıı Petrýhın óz josparlarymen bólisti.
«Qazaqstannyń sporttyq dańqy» ekspozıtsııasynda Memleket basshysyna otandyq, sheteldik sportshylardyń tartý etken syılyqtary, Elbasynyń jeke arhıvindegi qujattar, QR Ulttyq Olımpıada komıteti usynǵan materıaldar men sportshylardyń jeke zattary usynylǵan. Jádigerlerdiń qataryn kelýshiler V.Jırov pen M.Mázimbaevtyń belbeýin, A.Vınokýrovtyń velosıpedi men kıimin, saıahatshy-baıker D.I.Petrýhınniń syılyqtaryn kóre alady.
