Astanada «Mýzeıler túninde» qandaı is-sharalar uıymdastyrylady

ASTANA. QazAqparat – 18 mamyr kúni saǵat 18:00-de Astanadaǵy Ulttyq mýzeıde Halyqaralyq mýzeıler kúnine arnalǵan «Mýzeıler túni» aktsııasy ótedi.

ICOM Halyqaralyq mýzeıler keńesiniń tujyrymdamasyna sáıkes, bıylǵy jylǵy aktsııanyń taqyryby – «Mýzeıler, turaqtylyq pen ál-aýqat». Osyǵan baılanysty Ulttyq mýzeı ujymy elorda turǵyndary men qonaqtary úshin «Mýzeı-ýaqyt aǵymynda» atty aýqymdy tarıhı-tanymdyq jobasyn usynyp otyr.

Kúndizgi 10:00-18:00 aralyǵynda Ǵylymı kitaphanada «Mýzeıdiń qor saqtaý qyzmetin uıymdastyrý: teorııasy men praktıkasy» sımpozıýmy ótse, mýzeı zaldarynda «Baldyrǵan gıd» jobasy aıasyndaǵy sholý ekskýrsııalar, «Jádigerler sóıleıdi» kvest-sabaǵy uıymdastyrylady.

Keshki 18:00-den bastap Ulttyq mýzeı basylymdary men «Almaty-kitap» baspasynyń kitap kórmesi, «Tarıhı tulǵalar: qýyrshaq beınesinde» avtorlyq qýyrshaqtar kórmesi, «Kóneniń kózin ashý» atty QR Ulttyq mýzeıi Konservatsııa jáne qalpyna keltirý qyzmetiniń kórmesi men sheberlik sabaqtary, qolóner jármeńkesi, ǵylymı dárister, teatrlandyrylǵan ekskýrsııalar men oıyn-kvestter bastalady. «Juldyzdy gıd» jobasynda elge tanymal tarıhshylar Radık Temirǵalıev, Jaqsylyq Sábıtov, Muhıt-Ardager Sydyqnazarov, medıamenedjer Armanjan Baıtasov, bloger Dıas Kamerıdanov pen «Pygmalion» galereıasynyń negizin qalaýshy Danagúl Tólepbaı mýzeı zaldarynda ekskýrsııa júrgizedi.

Merekelik keshte úrmeli aspaptar orkestri, sımfonııalyq orkestr, bı ujymdary, dıdjeıler ónerlerin pash etip, sońynda otty shoý kórsetiledi.

«Mýzeıler túni»– elimizdiń mádenı ómirindegi eleýli oqıǵa, kópshilik asyǵa kútetin dástúrli sharalardyń biri. Aýqymdy sharanyń negizgi maqsaty – elimizdiń eń basty áleýmettik-mádenı mekemesi retinde mýzeıge degen kópshiliktiń qyzyǵýshylyǵyn oıatý, tarıhı-mádenı muralarǵa arnalǵan biregeı sharalar men baǵdarlamalar arqyly mýzeıdiń bedelin arttyrý. Ol jastardyń shyǵarmashylyǵyn damytýǵa, mádenı orta qurýǵa úlken septigin tıgizedi. Elordamyzdyń turǵyndary men qonaqtary úshin atalmysh shara mýzeı álemimen tanysýǵa, mýzeı kollektsııalary men ekspozıtsııasyn kórýge, mádenı baǵdarlamalarǵa qatysýǵa jáne kóńildi demalyp qaıtýǵa zor múmkindik beredi.

Aıta keteıik, keshki 18:00-den bastap halyqtyń barlyq sanaty úshin mýzeıge kirý – tegin.