Astanada mýzeıdegi tún ótedi
ASTANA. QazAqparat - Astanadaǵy QR Ulttyq mýzeıinde Halyqaralyq mýzeıler kúnine arnalǵan «Mýzeıdegi tún» aktsııasy ótedi. Shara 18 mamyrda saǵat 18:00-den 19 mamyrda saǵat 01.00-ge deıin bolady, dep habarlady mýzeıdiń baspasóz qyzmeti.
Aktsııa barysynda zaldarda tegin ekskýrsııalar uıymdastyrylady, onda mýzeı qonaqtary ejelgi jáne qazirgi Qazaqstannyń tarıhymen jáne mádenıetimen tanysady.
Sondaı-aq qonaqtardyń nazaryna qazaqstandyq estrada juldyzdarynyń qatysýymen kontserttik baǵdarlama usynylady. Merekelik shara ádemi lazerlik shoýmen aıaqtalady.
Búgingi kúni álemniń 40-tan astam elinde «Mýzeıdegi tún» ótkizý dástúrge aınaldy. Qazaqstanda da mýzeılerdiń kópshiligi búginde osy merekelik aktsııany úlken jaýapkershilikpen ótkizýde. Ulttyq mýzeı bul aktsııany ekinshi ret uıymdastyrǵaly otyr. Ótken jyly aktsııaǵa 23 myńnan astam adam qatysqan bolatyn.
