Astanada «Mýzeıdegi tún» aktsııasyna myńdaǵan qala turǵyny qatysty (FOTO)
ASTANA. QazAqparat - Elordada túnde mýzeılerge kirý tegin boldy. Kelýshiler eksponattarmen tanysyp, qazaqstandyq juldyzdardyń kompozıtsııalaryn tyńdady, sıqyrshylar men ıllıýzıonısterdiń ónerin, teatrlandyrylǵan qoıylymdar tamashalady. «Mýzeıdegi tún» aktsııasyna myńdaǵan qala turǵyny men qonaqtary qatysty, dep habarlady qalalyq ákimdiktiń baspasóz qyzmetinen.
QR Ulttyq mýzeıinde qonaqtar úshin qyzyqty baǵdarlama ázirlendi. Kelýshiler nazaryna qolónershilerdiń jármeńkesi, mýzeı týraly kitap usynyldy. Bul túni on ekspozıtsııalyq zaldyń bárinde ekskýrsııalar ótkizilip, LED-ekrandardan rolıkter kórsetildi. Mýzeıde zergerlik buıymdar, farfor, at ábzelderi, qarý-jaraqtar kollektsııasy men kilemder qoıylǵan.
- QR Ulttyq mýzeıi Halyqaralyq mýzeıler kúnine aldyn ala daıyndaldy. Mysaly, keshe balalar arasyndaǵy «Mýzeı álemine saıahat» sýret kórmesi ashyldy. Atalǵan shara kórkemsýret jáne grafıka úıirmesine baratyn balalar shyǵarmashylyǵynyń jemisi bolmaq. Búgin mýzeı isine arnalǵan kórme ashyldy - bul mýzeılik eksponattardy konservatsııalaý, restavratsııalaý. Osyndaı mereke jylyna bir ret ótedi, adamdar tutastaı otbasylarymen kelip, jańalyqtarmen, tarıhpen tanysady, - deıdi QR Ulttyq mýzeıiniń mádenı-bilim berý jumystary qyzmetiniń jetekshisi Janar Beıisova.
Qala turǵyndary mýzeıde otandyq shoý-bıznes ókilderiniń ónerin tamashalady. Qonaqtardyń kóbi mýzeıge alǵash ret kelgen eken.
Kelýshiler «Atameken» etnomemorıaldyq kesheninde bir túnde barsha respýblıkamyzdy aralap ótti. Olar elimizdiń óńirlerin tolyqtyra túsken jańa maketterdi tamashalady.
- «Atameken» Qazaqstan kartasy bıyl 15-shi maýsymyn ótkizedi. Ol óz jumysyn 1 mamyrda bastady. Bıyl jańadan 30 astam maket jasaldy, sondaı-aq kóbi qaıta jóndeldi. Astana boıynsha 20 artyq maket jańartyldy, sonyń ishinde Mınıstrlikter úıi, Qarjy mınıstrligi, qala ákimdigi, burynǵy QR Parlamenti ǵımaraty, «Otan Ana» jáne t.b., - dedi «Atameken» etnomemorıaldyq keshenniń dırektory Alma Altybaeva.
Mýzeı ekskýrsovodtary men shaqyrylǵan shyǵarmashylyq ujymdar kórermender úshin kontserttik baǵdarlama uıymdastyrdy. Sonymen qatar, ádettegideı lotereıa bıletteriniń utysy ótkizildi.
