Astanada mýzeı jáne kitaphana isiniń úzdikteri anyqtalady
NUR-SULTAN. QazAqparat - Ulttyq mýzeıde mádenıet jáne óner uıymdary men qyzmetkerleriniń «Rýhanı qazyna» atty festıvali qorytyndylanyp jatyr, dep habarlaıdy QazAqparat tilshisi.
Mádenıet jáne óner qyzmetkerleri kúnine arnalǵan festıval 19 mamyr kúni bastalǵan bolatyn. Ózara tájirıbe almasyp, áriptestik baılanys ornatýǵa múmkindik bergen sharany jyl úzdikterin marapattaý sharasy túıindemek. Mýzeı, kitaphana isiniń elimizge tanymal ókilderi ashyq túrde daýys berý arqyly mýzeı jáne kitaphana isiniń oblystyq, aýdandyq jáne aýyl deńgeıindegi úzdikterin anyqtaýy tıis.
Festıval qorytyndysyna saı, óz salasynyń úzdigi atanǵan ujymdarǵa 1 mln teńgeniń, úzdik qyzmetker atanǵan mádenıet ókiline 500 myń teńgeniń sertıfıkaty tabystalady.
«Úzdik aýdandyq mýzeı» atalymy boıynsha birinshi oryn ıelengen Qostanaı oblysynyń Lısakov qalalyq murajaıynyń dırektory Shynar Ermaǵambetova mundaı yntalandyrý mádenıet salasy ókilderine shabyt syılap, tabysty jumys isteýine qamshy bolatynyn aıtady.
«Lısakov qalasynyń halyq sany 41 myń adam ǵana. Sondaǵy jalǵyz mýzeı bolǵandyqtan, kóptegen mádenı sharalarǵa muryndyq bolyp júrmiz. Júzdegen mýzeılerdiń arasynda úzdik atanamyz dep oılaǵan da joqpyz. Qorymyzda 18 myń jádiger bar. Onyń kóbi arheologııalyq eksponattar. Jyl saıyn 16 myń adam keledi. Lısakov sııaqty shaǵyn shahar úshin bul aıtarlyqtaı kórsetkish. Sońǵy kezde eldegi mýzeıler óte tabysty eńbek etip keledi. Sondyqtan, búgingideı qoldaý sharalary óte oryndy ótkizilip otyr dep oılaımyn», - deıdi Shynar Ermaǵambetova.
