Astanada «Muzdy kezeń» mýltfılminiń qaıyrymdylyq kórsetilimi ótedi
ASTANA. QazAqparat - Búgin, 18 naýryz kúni saǵat 11:00-de «Qazmedıa» ortalyǵynyń kınokontsert zalynda «Qazaqstan» RTRK» AQ uıymdastyrýymen «Dısneı» kompanııasynyń «Muzdy kezeń» (frozen heart) mýltfılminiń qaıyrymdylyq kórsetilimi ótedi, dep habarlaıdy aktsıonerlik qoǵamnyń baspasóz qyzmeti.
Astana qalasy ákimdiginiń qoldaýymen júzege asyrylatyn sharanyń basty maqsaty - álemdik tanymal týyndyny qazaq tilinde usyný. Atalmysh mýltfılm 2016 jyly «Qazaqstan» RTRK» AQ-nyń dýblıaj stýdııasynda aýdarylyp, dybystalǵan.
Sharaǵa 6-11 jas aralyǵyndaǵy kórermender shaqyrylady. Olar Astana qalasyndaǵy kópbalaly otbasylardyń balalary, sondaı-aq, balalar úıi men ınternat úıleriniń tárbıelenýshileri. Kórermender sany shashamen 900 adamdy quraıdy.
«Qazaqstan» RTRK» AQ «Dısneı» kompanııasymen 2012 jyldan bastap birlese jumys istep keledi. Búgingi kúnge deıin «Qazaqstan» telearnasynyń dýblıaj bólimimen 100-den astam otbasylyq kórkem fılm, balalar fılmderiniń 138 bólimi, mýltserıaldardyń 828 bólimi jáne 16 tolyqmetrajdy mýltfılm aýdarylyp, dybystaldy.
Qazirgi ýaqytta «Dısneı» kompanııasy - gollıvýdtyq eń iri stýdııalardyń biri. Quramyna 11 oıyn-saýyqtyq park, eki akvapark, sondaı-aq, amerıkalyq teleradıohabar taratý kompanııasy kiretin (Eı-Bı-Sı) birneshe habar taratý jelisi bar.
