Astanada muzdan jasalǵan eń úzdik músinderdiń halyqaralyq baıqaýy bastaldy
ASTANA. QazAqparat - Astanada muzdan jasalǵan úzdik músinderdiń halyqaralyq baıqaýy ótýde, dep habarlaıdy QazAqparat.
Elorda ákimdiginiń resmı saıtynda málim etilgendeı, halyqaralyq konkýrstyń ashylýy búgin Botanıkalyq baqtyń aýmaǵynda ótti.
Maqsat - sýretshilerge shyǵarmashylyq tájirıbe almasýǵa jaǵdaı jasaý, qala turǵyndary men qonaqtarynyń bos ýaqytyn tıimdi uıymdastyrý, Astananyń ımıdjin mádenı týrızm ortalyǵy retinde qalyptastyrý.
«Muzdy músinder «Myń bir tún» taqyrybynda Esil ózeninen oıylyp alynǵan muzdardan jasalady. Qys maýsymynyń sońyna deıin qandaı músinder soǵylatyny biz úshin de jumbaq. Olar Botanıkalyq baq kelýshilerin qýantatyn bolady», - dedi Esil aýdany ákiminiń áleýmettik máseleler jónindegi orynbasary Nurlan Omarov.
Baıqaýǵa Qazaqstan, Reseı jáne Qytaı elderinen 6 komanda qatysýda. Qazaqstandyq komanda Aqtóbe, Qaraǵandy, Mańǵystaý, Batys Qazaqstan, Shyǵys Qazaqstan, Qyzylorda, Qostanaı, Aqmola jáne Almaty oblystarynyń músinshilerinen quralǵan. Al Astana qalasynyń atynan birden 4 komanda qatysýda. Ár komanda qazylar alqasyna bir músindi tanystyratyn bolady. Jeńimpazdar 16 qańtar kúni belgili bolady.
«Gran-prı jáne júldeli oryndarǵa ıe bolǵandar kýboktarmen, dıplomdarmen jáne aqshalaı sertıfıkattarmen marapattalady. Basqa qatysýshylar da nazardan tys qalmaıdy», - deıdi uıymdastyrýshylar.
