Astanada muz saraıy qurylysynda Kosovonyń úsh azamaty qaza tapty
ASTANA. QazAqparat - Astanada 20 metr bıiktikten qulaǵan úsh montajdaýshy jumysshy qaıtys bolyp, taǵy úsh adam aýrýhanaǵa jetkizildi, dep habarlady búgin elordalyq TJ departamentiniń baspasóz qyzmeti.
«Búgin 13 shildede, saǵat 11:04-te Esil aýdanynda salynyp jatqan «Astana qalasy kópbeıindi muz saraıy» qurylysynda jumys júrgizý barysynda «Mabco Construction S.A.» fırmasynyń astanalyq fılıalynyń 6 montajdaýshysy (boljammen Kosovo Respýblıkasynyń azamattary) 20 metr bıiktikten qulap ketti», - delingen habarlamada.
TJD aqparatynda olardyń esimi atalǵan. Úsh adam aýyr jaraqat saldarynan qaza tapty: Blerın Kadrıý (1981 j.t.), Bekım Dýrmısh (kim ekeni anyqtalýda), azııalyq bet-pishindi 40-45 jastaǵy er adam (kim ekeni anyqtalýda).
Astana qalasy №2 aýrýhanaǵa jaraqatpen jatqyzylǵandar: Avjı Maksýtı (1979 j.t.), Bıkolı Isýf (1956 j.t.), 35-40 jastaǵy er adam (kim ekeni anyqtalýda).
