Astanada muz qalashyqtary qaı jerde salynady
ASTANA. QazAqparat - Aǵymdaǵy jyly elordada «Han Shatyr» OSO, qala ákimdigi aldyndaǵy alań, Esil ózeni jaǵalaýy jáne «Stýdentter» saıabaǵy aýmaǵynda salynatyn negizgi 4 muz qalashynyń tujyrymdamasy men sulbasy ázirlengen.
Bul jaıynda QazAqparattyń resmı saýalyna oraı Astana qalasynyń mádenıet, muraǵat jáne qujattama basqarmasynan habarlady.
Jalpy, qala aýmaǵynda 7 muz qalashyǵy, 11 muz aıdyny, 37 shyrsha qondyrǵysy bolady. Basty muz qalashyǵy «Han Shatyr» oıyn-saýyq ortalyǵy aýmaǵynda ornatylady. «Han Shatyr» jáne qala ákimdigi aldyndaǵy muz qalashyqtary 19 jeltoqsanda, «Stýdentter» saıabaǵy aýmaǵyndaǵy muz qalashyǵy men muz aıdyny, Esil ózeni jaǵalaýyndaǵy muz aıdyny 25 jeltoqsanda ashylady.
Aıta keterligi, muz qalashyqtary halyq kóp jınalatyn ári zor suranysqa ıe oryndardyń biri sanalady. Osyǵan oraı aǵymdaǵy jyly «Han Shatyr» aýmaǵyndaǵy muz aıdynynyń aýmaǵyn 800 sharshy metrge deıin, qala ákimdigi aldyndaǵy aıdyn 580 sharshy metrge deıin ulǵaıtylyp, Esil ózeninde qosymsha taǵy bireýi salynady.
Munan bólek, elorda turǵyndary men qala qonaqtary úshin «Han Shatyr» janyndaǵy muz qalashyǵynda eń bıik syrǵanaý tóbesi salynady. Onyń ekeýiniń bıiktigi 5,5 metrden bolmaq. Sonymen qatar 4 ortasha, 5 shaǵyn tóbeshik syrǵanaýǵa arnalady. «Otan qorǵaýshylar» monýmenti janyndaǵy «Stýdentter» saıabaǵynda 5 jolaqty bir úlken, 2 jolaqty eki ortasha jáne 2 shaǵyn tóbeshik bolady.
Demalys jáne mereke kúnderi atalǵan muz qalashyqtarynda kelýshilerge arnalǵan túrli kóńil kóterý baǵdarlamalary usynylady.
