Densaýlyq saqtaý mınıstrligi vaktsınatsııa men aýtızmniń baılanysy bar-joǵyn túsindirdi
ASTANA. KAZINFORM — Qazaqstan Densaýlyq saqtaý mınıstrligi vaktsınatsııaǵa qatysty eń keń taralǵan mıfterdiń birin joqqa shyǵardy. Vedomstvo búgin málimdeme jasap, vaktsınatsııa men aýtızmniń damýy arasynda eshqandaı baılanys joq ekenin rastady.
Medıtsına ǵylymdarynyń doktory Dınagúl Baesheva da bul pikirdi qoldap, álemdik aýqymdaǵy kóptegen ǵylymı zertteýler ekpelerdiń aýtızmge sebep bolmaıtynyn dáleldegenin aıtty.
Mamandardyń aıtýynsha, vaktsınalar tek juqpaly aýrýlardyń aldyn alýǵa baǵyttalǵan jáne olardyń tıimdiligi men qaýipsizdigi uzaq jyldar boıy halyqaralyq deńgeıde zerttelgen. Sondyqtan ata-analarǵa tek ǵylymı negizdelgen aqparatqa súıený usynylady.
Baesheva Dınagúl Aıapbekqyzy — «Astana medıtsına ýnıversıteti» KeAQ balalar juqpaly aýrýlary kafedrasynyń meńgerýshisi, medıtsına ǵylymdarynyń doktory, joǵary sanatty ınfektsıonıst-dáriger turǵyndar arasynda jıi kezdesetin vaktsınatsııa týraly mıf aqparatty túsindirip berdi.
— Kóptegen ata-analar aýtızmdi vaktsınatsııamen baılanystyrady, sebebi aýrýdyń belgileri «ekpeden keıin» paıda bolady dep oılaıdy, — deıdi maman.
Alaıda ǵylymnyń naqty dáleli basqa: vaktsınalar aýtızmdi týdyrmaıdy. Bul mıllıondaǵan bala qatysqan iri zertteýlermen rastalǵan.
— Nelikten mundaı túsinbeýshilik týyndaıdy? Aýtızmniń alǵashqy belgileri kóbine 1,5–2 jasta, ıaǵnı revaktsınatsııa kezeńinde baıqalady. Biraq bul — tek ýaqyt jaǵynan tuspa-tus kelgen jaı ǵana sáıkestik. Mańyzdysy ýaqyttyń sáıkes kelýi sebep-saldar baılanysyn bildirmeıtinin bilgen jón. Aýtızm bala dúnıege kelmeı turyp qalyptasady jáne mı damýynyń erekshelikterimen, genetıkamen baılanysty, — dep túsindirdi dáriger.
Mamannyń aıtýynsha, vaktsınalar bul úderisterge áser etpeıdi — olar tek qaýipti ınfektsııalardan qorǵaıdy. Dárigerler kún saıyn qyzylsha, kókjótel jáne aldyn alýǵa bolatyn basqa da aýrýlardyń aýyr saldaryn kóredi. Ókinishke qaraı, keıde tym kesh bolady. Vaktsınatsııa — qaýip emes, qorǵanys.
Al elde qaı ınfektsııalar boıynsha jaǵdaı jaqsardy, myna siltemeden oqyńyz.
