Astanada «Musylman áleminiń beınesi» atty kórme ashyldy

dep habarlaıdy QazAqparat.

Bul shara QR Tuńǵysh Prezıdentiniń murajaıy, Sh.Mardjanı atyndaǵy ǵylymı jáne mádenı baǵdarlamalardy qoldaý jáne qorǵaý qorynyń uıymdastyrýymen ótýde.

Kórmege Mardjanı qory jınaǵan arab kallıgrafııasy negizinde jasalǵan baspa ónimderi jáne QR Tuńǵysh Prezıdenti murajaıynyń qoryndaǵy Quran basylymdary qoıylǵan.

«Bul kórme musylman álemi óneriniń bir salasy - shamaılge arnalǵan. Shamaıl degenimiz - Edil ózeni boıyndaǵy arab-tatarlardyń 19-shy ǵasyrdyń sońy men 20-shy ǵasyrdyń basynda paıda bolǵan erekshe tóltýma janry. Ol sokraldy negizdegi qasıetti beıneler kórinis tabatyn kórkemsýret óneri. Ondaǵy sýretterde ıslam álemindegi qasıetti jerler, dinı mátinder, Quran kitabyndaǵy sózder, Muhammed paıǵambardyń Hadısteri beınelenedi», deıdi Mardjanı qorynyń vıtse-prezıdenti Murad Zargıshıev .

Onyń aıtýynsha, basqa elderdiń shamaıl ónerinde ıslam dinine sińirgen eńbegi úshin halıfalardyń beıneleri men keskindemeleri salynady. «Tatar shamaıliniń bir ereksheligi sol - onda adam sýreti bolmaıdy. Bul ıslam dinindegi barlyq kanondarǵa jaýap beredi», dep atap kórsetti ol.

Arab tilinen aýdarǵanda «shamaıl» sózi «qadir -qasıet,abyroı» degen maǵynany bildiredi. Parsy tilinde «shamaıel» sózi qosymsha maǵynaǵa -«kıeli sýret, keskindeme, beıne» maǵynasyna ıe.

Sýretten jalpy ıslam dininiń ustanymdyryn kórýge bolady. Mekkede basylyp, arnaıy qobdıshaǵa salynǵan, metalmen bezendirilgen aǵash muqabaly «Quran- Kárim» úlgisi kórmeniń kórki boldy. Sonymen qatar, kórmege Elbasyna ǵaryshker Talǵat Musabaev tartý etken, ǵaryshta bolyp qaıtqan Quran kitaby da qoıylǵan.