Astanada músin óneriniń halyqaralyq kórmesi ashyldy
ASTANA. QazAqparat - Elordadaǵy Beıbitshilik jáne kelisim saraıynda toǵyz eldiń músinshileriniń týyndysy qoıylǵan músin óneriniń halyqaralyq bıennalesi jumysyn bastady, dep habarlaıdy «QazAqparat» HAA tilshisi.
Kórmege otandyq músinshilermen birge Germanııa, Nıderlandy, Shveıtsarııa, Frantsııa, Ulybrıtanııa, Reseı, Qyrǵyzstan elderiniń avtorlarynyń músini qoıylǵan. Bıennaleniń ótkizilýine QR Mádenıet jáne sport mınıstrligi muryndyq bolǵan. QR Sýretshiler odaǵynyń hatshysy, táýelsiz sarapshy Kamılla Lıdiń aıtýynsha, halyqaralyq dárejedegi bıannaleni ótkizý asa zor daıarlyqty talap etetin jaýapty tapsyrma. Osy údeden shyǵa bilgen Astana az ýaqyttyń ishinde aýqymdy sharany abyroımen ótkizip otyr.
Jıynda sóz sóılegen professor, QR eńbek sińirgen qaıratkeri Baıtursyn Ómirbekov EKSPO-2017 kórmesi ótip jatqan ýaqytqa tuspa-tus ashylǵan bıennale músinshilerdiń shyǵarmashylyq ónerine shabyt beretinin atap ótti. Professordyń sózine súıensek, Eurasia Sculpture Biannale qazirgi zamannyń músin óneriniń órkendeýine tyń serpin beredi.
«Kórmege sheteldiktermen birge qazaqstandyq músinshilerdiń de týyndylary qoıyldy. Qala turǵyndary men qonaqtary úshin bir aı kóleminde bıennaleni tamashalaýǵa múmkindik bar», - deıdi Baıtursyn Ómirbekov.
Kórme aldynda qazylar alqasy músinshilerdiń arasynda saıys ta ótkizgen eken. Osylaısha, elýge jýyq týyndynyń ishinde bas júldeni músinshi Mergen Álibekov «Alataý» shyǵarmasymen jeńip alyp, oǵan 300 myń teńgeniń sertıfıkaty buıyrdy. Al birinshi orynǵa Shveıtsarııadan kelgen Eten Krahenbýl «Toqtatylǵan ýaqyt» týyndysymen ıe boldy. Oǵan 200 myń teńgeniń sertıfıkaty tapsyryldy. Ekinshi jáne úshinshi oryndardy reseılik jáne qazaqstandyq óner ıeleri jeńip aldy.
Kórme tamyz aıynyń 4 juldyzyna deıin jalǵasady.
