Astanada músháıra jeńimpazdary marapattaldy
ASTANA. 2 shilde. QazAqparat - Elordanyń 15 jyldyǵyna oraı Kongress-Holl saraıynda «Jarqyra, Jaına, Astana!» jyr músháırasynyń jeńimpazdary anyqtalyp, olardy marapattaý rásimi ótti,
dep habarlady astana.kz saıty.
S.Seıfýllın murjaıy men Qazaqstan Jazýshylar odaǵynyń elordalyq fılıaly uıymdastyrǵan músháıraǵa 12 aqyn qatysty. Al, jalpy baıqaýǵa elimizdiń barlyq aımaqtarynan 70-ke tarta shyǵarma kelip tústi.
«Úsh jyldan beri aqyndar elimizdiń basty merekelerine jyr arnap, kitaptar shyǵaryp keledi. Alǵashqy báıge Táýelsizdik kúnine oraı ótkizilse, QR Tuńǵysh Prezıdenti kúni men Astana kúnine osyndaı aýqymdy músháıra uıymdastyrylyp otyr», - dedi S.Seıfýllın murajaıy dırektorynyń orynbasary Serikhan Sabyrbekov.
Qazylar alqasynyń sheshimi boıynsha, bas júlde - jeńil kólik «Astana - dastan» jyr jınaǵy men «Muqaǵalı» teatrlandyrylǵan qoıylymy úshin tanymal aqyn, dramatýrg Serik Turǵynbekovke berildi.
Ekinshi oryn óz shyǵarmasynda bas qalaǵa degen ystyq sezimin jyrmen órnekteı bilgen Sáýle Dosjanovaǵa buıyrdy. Baıqaýǵa ol «Astana sýretteri» óleńder tsıklin usynǵan.
Osy attary atalǵan aqyndarmen birge Kongress-hollda músháıranyń basqa júldegerleri de óleńderin oqyp, jyr súıer qaýymnyń júregine jol taýyp jatty. Atap aıtqanda, júldegerler qatarynda «Astanamen syrlasý» óleń kitaby úshin birinshi oryn alǵan Baýyrjan Jaqyp, «Mereı toıyń qutty bolsyn, Astana!» jyr jınaǵy úshin ekinshi orynǵa ıe bolǵan Kákimbek Salyqov, úshinshi oryn ıegerleri Mahset Álseıitov, Janat Áskerbekqyzy, Erlan Júnis boldy. Al kótermeleý syılyqtaryn Abylaı Tolybaev, Maǵıza Qunapııaqyzy, Aýyt Muqıbek, Roza Seıilhan jáne Qaırat Sabyrbaı aldy.
Úzdik ádebı shyǵarmalar Ortalyqtandyrylǵan kitaphana júıesi arnaıy shyǵaratyn «Astana baǵy bıik asqarymsyń» jınaǵyna enedi.
