Astanada Muńaıtpasov atyndaǵy stadıonnyń ornyna jańa nysan salynady

 Elordadaǵy Qajymuqan Muńaıtpasov atyndaǵy ortalyq stadıonnyń ornyna jańa nysanyń qurylysy 2024 jyly bastalady. Bul týraly Astana qalasy Dene shynyqtyrý jáne sport basqarmasynyń basshysy Samat Jylqybaev aıtty, dep habarlaıdy Kazinform.

«Qajymuqan Munaıtpasov atyndaǵy stadıonnyń ornyna jańa nysannyń qurylysy boıynsha 2021 jylǵy 28 shildede «Qurylyskonsaltıng» Ulttyq ortalyǵy» AQ-men jobalaý jumystary boıynsha shart jasaldy. Sonymen qatar, 2022 jylǵy 15 naýryzda eski stadıondy súrip tastaý jobasyna keshendi saraptamanyń oń qorytyndysy alyndy», - delingen Astana ákimdiginiń Kazinform agenttigine bergen jaýabynda.

Atap aıtqanda, bıylǵy 20 sáýirde eskızdik joba Astana qalasynyń Sáýlet, qala qurylysy jáne jer qarym-qatynastary basqarmasymen kelisilgen. Al jeltoqsan aıynda qurylysqa qatysty tıisti qorytyndy alý josparlanǵan.

«2024 jyly jańa stadıondy salý boıynsha qurylys-montajdaý jumystaryn bastaý josparlanyp otyr. Jańa stadıon 2025 jylǵy shilde aıynda paıdalanýǵa berilmek», - dep naqtylady elorda ákimdigi.

Budan buryn habarlanǵandaı, 2021 jyly qala ákimdigi Qajymuqan Muńaıtpasov atyndaǵy ortalyq stadıonnyń jańa ǵımaratyn salý úshin eskızdik joba jasalyp jatqanyn jarııalady. Sol kezde stadıon apattyq jaǵdaıda turǵany aıtylǵan edi.