Astanada múmkindigi shekteýli jandarǵa sportpen aınalysý qoljetimdi bola tústi
ASTANA. QazAqparat - Múmkindigi shekteýli astanalyqtar úshin tegin sport qoljetimdi bola túspek. Bul týraly memorandýmdy elorda ákimdigi pen Astananyń paralımpıadalyq jattyqtyrý ortalyǵynyń «Kaspıı» sportty damytý qory bekitti, dep habarlaıdy qalalyq ákimdiktiń resmı saıty.
Paralımpıadalyq jattyqtyrý ortalyǵy elordada óz jumysyn osy jyly bastady. Al 2019 jyldyń 1 qańtarynan bastap ol tek paralımpııa sportshylary úshin ǵana emes, dene shynyqtyrýmen, sportpen aınalysqysy keletin barlyq múmkindigi shekteýli adamdar úshin de ashyq bolady.
Tıisti memorandýmǵa memleket-jekemenshik áriptestik aıasynda «Kaspıı» sportty damytý qory» qoǵamdyq qorynyń prezıdenti Qazbek Qapanov pen Astananyń qalalyq ortany regeneratsııalaý basqarmasynyń basshysy Ǵalı Isqalıev qol qoıdy.
«Astana ákimdiginiń qoldaýynyń arqasynda bul ortalyqtyń 2019 jyldyń 1 qańtarynda «Múmkindigi shekteýli azamattar úshin paralımpıadalyq jattyqtyrý ortalyǵy men «Tarlan» muz arenasynyń qyzmetin uıymdastyrý» jobasynyń sheńberinde qalanyń barlyq múgedek jandaryn qarsy alýǵa búgin tolyqtaı daıyn ekendigin aýyz toltyryp aıta alamyz», - dedi QR Ulttyq paralımpııa komıtetiniń atqarýshy dırektory Erlan Súleımenov.
Aıta keteıik, Astanada 24 myńǵa jýyq múgedek adam bar. Olardyń jartysyna jýyǵy - 1, 2 toptaǵy múgedekter.
«Sonyń ishinde tek 300-ge jýyq múgedektigi bar sportshy «Jiger» ortalyǵynda jattyǵady. Bul, árıne óte az. Degenmen budan bylaı atalmysh kórsetkish arta túspek. 2019 jyldan bastap qaladaǵy barlyq múgedekter tájirıbeli jáne oqytylǵan jattyqtyrýshylardyń jetekshiligimen sporttyń onnan astam túrimen aınalysa alatyn bolady», - dedi ol.
Júrgizilgen zertteýlerge sáıkes, joba uıymdastyrýshylary sporttyq jattyǵýlardyń astanalyq múmkindigi shekteýli turǵyndardyń jartysynan kóbiniń arasynda suranysqa ıe bolady dep kútedi.
Paralımpıadalyq jattyqtyrý ortalyǵynyń kúnine 780 adamdy qabyldaıtyn qaýqary bar. «Tarlan» muz arenasy múmkindigi shekteýli adamdar úshin kelesi jyldyń shildesine qaraı beıimdendiriledi dep josparlanyp otyr.
