Astanada múmkindigi shekteýli jandar jumysqa kvota boıynsha ornalasa alady
ASTANA. QazAqparat - Elordalyq jumys berýshiler shtattaǵy qyzmetkerlerdiń sanyna baılanysty múmkindigi shekteýli jandar úshin jumys oryndaryna kvota bóletin boldy.
Máselen, 50-den 100 adamǵa deıin - 2%; 100-den 250 adamǵa deıin - 3%; 251-den joǵary - 4%.
Sonymen qatar, jumys oryndaryna kvota probatsııa qyzmetinde esepte turǵan tulǵalarǵa, bas bostandyǵynan aıyrý oryndarynan bosatylǵan tulǵalarǵa, kámelettik jasqa tolǵanǵa deıin ata-anasynan aıyrylǵan nemese ata-analarynyń qamqorlyǵynsyz qalǵan jastar qataryndaǵy bilim berý uıymdarynyń túlekteri bolyp tabylatyn tulǵalardy 1% kóleminde jumysqa ornalastyrý úshin kvotalar belgileıdi.
Osyǵan baılanysty Astana qalasynyń jumys berýshileri toqsan saıyn jumys oryndarynyń sany men kvotany oryndaý týraly málimetterdi Astana qalasy ákimdiginiń Halyqty jumyspen qamtý ortalyǵynyń málimetterdi qabyldaý portalyna (www.cz.e-akimat.kz) esep berý aqparatyn ótkizýi tıis.
Jumyspen qamtý, eńbek jáne áleýmettik qorǵaý basqarmasynyń basshysy Ermek Ospanovtyń aıtýynsha, bekitilgen kvotalar áleýmettik osal toptarǵa jatatyn jandarǵa eńbek naryǵynda óz ornyn tabýǵa múmkindik beretin bolady.
Eske salaıyq, 2016 jyly jumys taba almaı júrgen 599 múmkindigi shekteýli tulǵa áleýmettik qorǵaý sharalarymen qamtyldy. Sonyń ishinde 238 adam eńbekke ornalastyryldy, tólenetin qoǵamdyq jumysqa 355 adam qatysty jáne daıarlaý, qaıta daıarlaý, biliktilikti arttyrý oqýlarynan 6 adam ótti.
