Astanada múmkindigi shekteýli jandar úshin «Ár túrli, biraq teń» baıqaýy ótedi
ASTANA. 10 shilde. QazAqparat - Elordada múmkindigi shekteýli adamdar arasyndaǵy Birinshi respýblıkalyq baıqaý aıasynda alǵash ret «Ár túrli, biraq teń» baıqaýy ótedi, dep habarlady Astana qalasynyń resmı saıty.
Qalalyq baıqaýdyń irikteý kezeńi tamyzdyń 2-si men 13-i aralyǵynda kelesi atalymdarda uıymdastyrylady: «Úzdik áleýmettik joba», «Úzdik kásip ıesi», «Aqyldylar», «Úzdik stýdent», «Úzdik bıshi», «Úzdik oryndaýshy», «Úzdik ónertapqysh», «Altyn qalam», «Eń tatý otbasy», «Úzdik sportshy» jáne «Jeńiske degen jigeri úshin».
«Ár túrli, biraq teń» baıqaýy jas talanttardy anyqtaýǵa, múmkindigi shekteýli jandardyń shyǵarmashylyǵyn kóterýge, kreatıvti damytýǵa, oılaý qabiletin keńeıtýge jáne shyǵarmashylyq baılanys ornatýǵa baǵyttalǵan. Baıqaý múmkindigi shekteýli jandardyń máselelerine, olardyń shyǵarmashylyǵyna qoǵam nazaryn aýdarýdy kózdeıdi. Sondaı-aq, baıqaýǵa qatysýshylardyń qabilet-qarymyn ushtaýǵa múmkindik beredi. Sonymen qatar atalǵan baıqaý qaıyrymdylyqty arttyrýdy ditteıdi.
Baıqaýǵa 6 jas pen 35 jas aralyǵyndaǵy kembaǵal jandar qatysa alady. «Úzdik áleýmettik joba», «Mamandyǵynyń úzdigi» atalymy 18 ben 45 jas aralyǵyndaǵy qatysýshylarǵa beriledi. Qatysýshylardyń jasy baıqaýǵa qatysýǵa ótinish bildirgen sátte anyqtalady. Jeńimpazdardy ár atalym boıynsha irikteý: 6 jastan 14-ke deıin, 14 -ten 29-ǵa deıin, 29 jastan 45 jasqa deıin jas ereshelikterine qaraı toptalyp, júzege asyrylady.
