Astanada múmkindigi shekteýli adamdardyń qoldarynan shyqqan buıymdardyń kórmesi ótip jatyr
ASTANA. QazAqparat - Astanada «Uly dala eli» 25 ıgi is» aktsııasy sheńberinde «Han Shatyr» saýda ortalyǵynyń bazasynda elorda ákimdiginiń qoldaýymen múmkindigi shekteýli adamdardyń qoldarynan shyqqan qolóner buıymdarynyń kórmesi ótip jatyr.
El táýelsizdiginiń 25 jyldyǵyna arnalǵan sharanyń uıymdastyrýshylary - elordanyń Jumyspen qamtý basqarmasy men Kásipkerlik jáne ónerkásip basqarmasy. Kórmege qatysýshylardyń arasynda qaladaǵy jáne elordaǵa jaqyn jatqan óńirlerdiń bes úkimettik emes uıymynyń qolónershileri bar. Shara múmkindigi shekteýli adamdardyń yntasyn arttyrýǵa jáne olardyń qyzmetin nasıhattaýǵa baǵyttalǵan, deıdi uıymdastyrýshylar.
Elorda turǵyndary men qonaqtarynyń nazaryna múmkindigi shekteýli adamdardyń qoldarynan shyqqan álemdik brendterden esh kem túspeıtin túrli kádesyılar, kıiz, monshaq, tabıǵı tastardan jasalǵan biregeı buıymdar usynyldy, dep habarlaıdy ákimdiktiń baspasóz qyzmetinen.
Kórme qatysýshylarynyń arasynda «Ǵajaıyp sheberler álemi» aıryqsha qajettilikteri bar adamdardy qoldaý ortalyǵynyń negizin qalaýshy Raýza Balmaǵambetova bar, ol 2011 jyldan beri qulaǵy nashar estıtin adamdardy qamqorlyǵyna alyp, kádesyı ónimderiniń óndirisin jolǵa qoıǵan.
Onyń aıtýynsha, bastapqyda kásiporynda eki adam eńbek etken, al ústimizdegi jyldyń qorytyndysy boıynsha olardyń sany 38-ge jetken.
«Meniń bar qalaǵanym - bul adamdardy aıaǵyna nyq turǵyzyp, olardyń sheberlikterin kórý. Olardy kásipke úıretý - shaǵyn joba, biraq ol eńbektenýdi, tózimdilik pen kóp nazardy qajet etedi. Biraq búgingi kórme iske aspaıtyn maqsat bolmaıtynyn kórsetti. Búginde ákimdiktiń qoldaýymen bizdiń buıymdar elordanyń iri saýda ortalyqtarynda, «Báıterek» monýmentinde qoıylǵan, bul áleýmettik áriptestiktiń, jáne memleket tarapynan kórsetiletin qoldaýdyń kórsetkishi bolyp tabylady. Bizdiń endigi maqsatymyz - « EKSPO-2017» halyqaralyq mamandandyrylǵan kórmesine qatysý», - deıdi Raýza Balmaǵambetova.
Sonymen qatar, sharaǵa múgedekterdiń «Dos» Táýelsiz ómir» QB ókilderi de qatysty, olar kelýshilerdiń nazaryna sándik-qoldanbaly, qysh pen aǵashtan jasalǵan buıymdaryn usyndy. Sondaı-aq, kontserttik baǵdarlama ázirledi. Búgingi kúni qoǵamda múgedektiktiń túrli toptaryna jatatyn 15 adam eńbek etedi.
«Biz áleýmettik kásipkerliktiń jańa deńgeıine shyqtyq. Búgingi kórmede bizdiń shyǵarmashylyq ujym alǵash ret óner kórsetti. Biz Táýelsizdiktiń 25 jyldyǵy sheńberinde óz jetistikterimizdi kórsetýge qýanyshtymyz», - dep málim etti ákimniń múgedekter máseleleri jónindegi kómekshisi Dına Erdildınova.
