Astanada múgedektikti rásimdeý tártibi jeńildeıdi
ASTANA. KAZINFORM — Astanada azamattyń múgedektigin anyqtaý jáne oǵan qajetti áleýmettik qoldaý kórsetý protsesi bir júıege biriktiriledi. Bul týraly qalalyq Ortalyq kommýnıkatsııalar qyzmetinde ótken baspasóz májilisinde Astana qalasy Halyqty áleýmettik qorǵaý salasyndaǵy retteý jáne baqylaý komıteti departamenti basshysynyń orynbasary Lázzat Sartymbetova málimdedi.
Onyń aıtýynsha, jańa tásil memlekettik qyzmetterdi azamat úshin barynsha qarapaıym ári túsinikti etýge baǵyttalǵan.
— Buǵan deıin múgedektikti rásimdeý kezinde azamat qaı mekemege júginý keregin, qandaı qujattar qajet ekenin ózi anyqtap, birneshe kezeńnen ótýge tıis bolatyn. Keı jaǵdaıda bir qujatty birneshe ret usynýǵa týra keletin. Endi bul tásil ózgerip, memlekettik qyzmetter azamattyń naqty ómirlik jaǵdaıyna qaraı uıymdastyrylady. Biryńǵaı marshrýt múgedektikti belgileý qajettiligi týyndaǵan kezden bastap tıisti áleýmettik qoldaý sharalaryn alǵanǵa deıingi protsesti qamtıdy, — dedi spıker.
Vedomstvo málimetinshe, 2026 jylǵy 25 tamyzdaǵy málimet boıynsha, Astanada 43 403 múgedektigi bar adam turady. Onyń 5 346-sy — birinshi toptaǵy, 11 733-i — ekinshi toptaǵy, 13 339-y — úshinshi toptaǵy múgedektigi bar azamattar. Sondaı-aq elordada 18 jasqa deıingi múgedektigi bar 12 985 bala bar.
— Bıylǵy birinshi jartyjyldyqta medıtsınalyq-áleýmettik saraptama bólimderi 10 466 qyzmet kórsetti. Onyń 5 048-i kúndizgi formatta, 5 418-i syrttaı-proaktıvti formatta kórsetilgen. Salystyrsaq, 2025 jyldyń sáıkes kezeńinde 9 617 qyzmet kórsetilgen. Onyń 5 261-i kúndizgi, 4 356-sy syrttaı-proaktıvti formatta bolǵan. Osylaısha, syrttaı-proaktıvti qyzmetterdiń úlesi bir jylda 45,3%-dan 51,8%-ǵa deıin artty, — dedi departament basshsynyń orynbasary.
Lázzat Sartymbetovanyń sózinshe, bıyl alǵash ret medıtsınalyq-áleýmettik saraptamadan 2 543 adam ótken. Onyń 2 464-i múgedektigi bar adam dep tanylǵan. 2025 jyldyń sáıkes kezeńinde alǵash ret kýálandyrylǵandar sany 2 373 adam bolsa, onyń 2 305-ine múgedektik belgilengen.
Aıta keteıik, buǵan deıin múgedektikti rásimdeý kezinde qandaı qujattar qajet jáne qandaı talaptar qoıylatyny habarlandy.
