Astanada múgedektikti anyqtaý protsesi qalaı júrgiziledi
ASTANA. KAZINFORM — Astana qalasy boıynsha Halyqty áleýmettik qorǵaý salasyndaǵy retteý jáne baqylaý komıteti departamenti basshysynyń orynbasary Lázzat Sartymbetova qalalyq OKQ-de ótken baspasóz májilisinde múgedektikti anyqtaý úshin azamat qandaı kezeńderden ótetinin túsindirdi.
Onyń aıtýynsha, alǵashqy kezeń medıtsınalyq kómek kórsetýden bastalady. Eger adamnyń aýrýy nemese densaýlyǵynda turaqty buzylystar bolsa, ol medıtsınalyq uıymǵa júginip, em qabyldaıdy jáne qajetti tekserýlerden ótedi. Tekserý nátıjeleri medıtsınalyq aqparattyq júıege engiziledi.
— Densaýlyq jaǵdaıy adamnyń júrip-turýy, eńbek etýi nemese ózine-ózi qyzmet kórsetýi qıyndasa, medıtsınalyq uıym ony medıtsınalyq-áleýmettik saraptamaǵa jiberedi. Qoldanystaǵy tártip boıynsha da múgedektikti anyqtaý úshin áýeli medıtsınalyq uıymǵa júginip, qajetti dıagnostıkadan ótý qarastyrylǵan, — dedi ol.
Kelesi kezeń — medıtsınalyq-áleýmettik saraptama. Departament dırektorynyń aıtýynsha, munda adamnyń dıagnozy ǵana emes, aýrýdyń onyń kúndelikti ómirine qanshalyqty áser etetini de baǵalanady. Atap aıtqanda, eńbek etý, júrip-turý, ózine-ózi qyzmet kórsetý múmkindigi jáne qandaı qoldaýǵa muqtaj ekeni eskeriledi.
— Birqatar jaǵdaıda saraptama syrttaı-proaktıvti formatta júrgiziledi. Osylaısha, azamattyń medıtsınalyq qujattary elektrondy túrde qaralyp, sheshim onyń jeke qatysýynsyz qabyldanady. Mundaı tásil, ásirese ózdiginen júrip-turýy qıyn adamdar úshin mańyzdy. Syrttaı kýálandyrý kezinde qujattardy joldaýdan bastap saraptamalyq sheshim shyǵarýǵa deıingi kezeńder aqparattyq júıeler arqyly júzege asyrylady, — dedi spıker.
Lázzat Sartymbetovanyń málimetinshe, qazir Astanada syrttaı-proaktıvti formattyń úlesi 53,2%-ǵa jetken. Respýblıkalyq ortasha kórsetkish — 47,5%.
Múgedektik belgilengennen keıin azamatqa qajetti áleýmettik qoldaý sharalary naqtylanady. Oǵan aqshalaı tólemder, ońaltýdyń tehnıkalyq quraldary, arnaýly áleýmettik qyzmetter, jeke kómekshi nemese áleýmettik qyzmetker qyzmeti, sondaı-aq sanatorıılik-kýrorttyq emdelý kirýi múmkin.
— Máselen, múgedektigi bar balaǵa ońaltýdyń jeke baǵdarlamasy ázirlenip, onyń aıasynda qajetti tehnıkalyq quraldar men sanatorıılik-kýrorttyq emdelýge joldama qarastyrylýy múmkin, — dedi ol.
Aıta óteıik, buǵan deıin Astanada múgedektikti rásimdeý tártibi jeńildeıtinin jazǵanbyz.
