Astanada múgedektigi bar sportshylarǵa arnalǵan mektep ashyldy
ASTANA. QazAqparat - Elordadaǵy Paralımpııalyq jattyǵý ortalyǵynda keshe, 22 qańtarda Astana qalasy ákimdigi janynan múmkindigi shekteýli sportshylarǵa arnalǵan balalar-jasóspirimder sport mektebiniń resmı ashylý saltanaty ótti, dep habarlaıdy QazAqparat qalalyq Mádenıet jáne sport basqarmasyna silteme jasap.
Osy sharaǵa oraı ótken baspasóz máslıhatynda, Mádenıet jáne sport basqarmasynyń basshysy Bolat Majaǵulov qaıta qurylǵan mekemeniń erekshelikteri men jumysy jáne búginde múmkindigi erekshe jandardy sportqa barynsha tartý úshin qandaı sharalardyń qabyldanyp jatqandyǵy týraly aıtyp berdi.
- Memleket basshysy halyqtyń áleýmettik osal toptaryn qoldaýǵa kóp kóńil bóledi. «Qazaqstan joly: Bir maqsat, bir múdde, bir bolashaq» taqyrybyndaǵy Joldaýynda Nursultan Ábishuly Nazarbaev múmkindigi shekteýli azamattarǵa basa nazar aýdarý qajet ekendigin erekshe atap ótti. Memleket basshysynyń tapsyrmasymen Astana qalasynyń ákimdigi múgedek sportshylarǵa respýblıkalyq jáne halyqaralyq jarystarda elordanyń jáne elimizdiń namysyn qorǵaýyna múmkindik berý maqsatynda jattyǵýǵa jaǵdaı jasaý sharalaryn qolǵa aldy, - dedi basqarma basshysy.
Onyń aıtýynsha, qazirgi kezde múgedektigi bar jandarǵa arnalǵan sport mektebinde 17 sport túri damytylýda: arbamen bı bıleý, otyryp voleıbol oınaý, grek-rım kúresi, erkin kúres, doıby, shahmat, toǵyzqumalaq, jeńil atletıka, júzý, paýerlıftıng, ústel tennısi, fýtbol, taekvondo, asyq atý, dzıýdo, bochcha jáne golbol. Júzýshiler men jeńil atletterden basqa sportshylar Paralımpııalyq jattyǵý ortalyǵynda daıyndalady. Júzýshiler men jeńil atletter «Alataý» sport kesheninde jattyǵady.
Mektepte 24 jattyqtyrýshy, tórt júzge jýyq sportshy, onyń ishinde halyqaralyq dárejedegi sport sheberleri, QR sport sheberleri jáne sport sheberligine kandıdattar bar.
Taǵy da bir aıta keterlik jaıt, 2019 jyldyń 1 qańtarynan bastap Astana turǵyndary jasy men múgedektiginiń tobyna qaramastan Paralımpııalyq jattyǵý ortalyǵynda tegin jattyǵa alady. Bul úshin múgedektigi bar ekendigin rastaıtyn anyqtama, mekenjaı anyqtamasy jáne jeke kýálik qajet.
- Ortalyq qajetti kúshtik jáne kardıo trenajerlarmen, voleıbol oınaýǵa, arbada otyryp, bı bıleýge, jekpe-jektermen, ústel tennısimen jáne múgedektigi bar adam úshin jan saýlyǵy men tán saýlyǵy úshin basqa da sport túrlerimen aınalysýǵa arnalǵan zaldarmen jabdyqtalǵan. Bul múgedektigi bar adamdarǵa demalysyn Paralımpıadalyq ortalyqta nıettesteriniń ortasynda ótkizýge múmkindik beredi,-dedi Bolat Majaǵulov.
Onyń sózine qaraǵanda, Paralımpııalyq ortalyq kúnine 600-ge jýyq adamdy qabyldaı alady.
- Bizdiń endigi mindetimiz - mundaı mekemeniń bar ekendigi týraly múmkindigi shekteýli jandardy barynsha habardar etý, - dedi Mádenıet jáne sport basqarmasynyń basshysy jýrnalısterge.
Foto: Erkebolat Bısarımov
