Astanada múgedektigi bar adamdardyń ómir sapasyn arttyrýǵa baǵyttalǵan jobalar tanystyryldy
ASTANA. KAZINFORM - Astanada ITMLab 2.0 ulttyq jobasynyń fınaly ótti. Іs-shara barysynda múgedektigi bar adamdardyń ómir súrý sapasyn arttyrýǵa baǵyttalǵan testileýden ótken tehnologııalyq prototıpter tanystyryldy.
QR Eńbek jáne halyqty áleýmettik qorǵaý mınıstrligi baspasóz qyzmetiniń habarlaýynsha, Astana Hub halyqaralyq tehnoparkinde ınklıýzıvti tehnologııalardyń ITMLab 2.0 akseleratsııalyq baǵdarlamasynyń ekinshi maýsymynyń qorytyndy is-sharasy – Demo Day ótti.
Alań múgedektigi bar adamdardyń ómir súrý sapasyn arttyrýǵa baǵyttalǵan tehnologııalyq sheshimderdi tanystyrý úshin memleket, bıznes, ınvestorlar jáne azamattyq sektor ókilderiniń basyn qosty.
Jobany QR Eńbek jáne halyqty áleýmettik qorǵaý mınıstrliginiń jáne «Shevron» kompanııasynyń qoldaýymen ITeachMe qoǵamdyq qory iske asyryp jatyr. Bastamanyń basty maqsaty – tehnologııalar erekshe qajettilikteri bar azamattardyń teń qoljetimdiligin jáne áleýmettenýin qamtamasyz etý úshin naqty qural retinde áreket etetin turaqty ekojúıeni qurý.
Demo Day jumysyna QR Eńbek jáne halyqty áleýmettik qorǵaý mınıstri Asqarbek Ertaev qatysty. Vedomstvo basshysy usynylǵan jobalarmen tanysyp, memlekettik kún tártibi aıasynda mundaı bastamalardyń mańyzdylyǵyn atap ótti.
-2024 jyldan bastap biz 2030 jylǵa deıingi jańa Inklıýzıvti saıasat tujyrymdamasyn iske asyrýdy bastadyq. Memleket basshysy jarııalaǵan bıylǵy Tsıfrlandyrý jyly onymen tyǵyz úılesedi. Memleketke osyndaı tehnologııalyq sheshimder qajet. Sondyqtan, granttardan bólek, biz jobalar naryqqa shyqqanǵa deıin olarǵa tálimgerlik qoldaý men tolyq súıemeldeýdi qamtamasyz etetin bolamyz. Mınıstrlik bıylǵy jyly birqatar óziniń tsıfrlyq sheshimderin engizip jatyr. Olardyń qatarynda – múgedektik tobyn belgileý kezinde jasandy ıntellektini paıdalaný, sondaı-aq ınklıýzıvti jumyspen qamtýdy damytý úshin jumys oryndaryn kvotalaý tetigin ortalyqtandyrý jobasy bar, – dep atap ótti Asqarbek Ertaev.
Fınal aıasynda elimizdiń 10 óńirinen kelgen 10 ázirleýshiler toby ózderiniń testileýden ótken tehnologııalyq prototıpterin tanystyrdy. Buǵan deıin qatysýshylar qatań konkýrstyq irikteýden ótip, óz ázirlemelerin is júzinde iske asyrýǵa 600 000 teńge kóleminde maqsatty granttyq qoldaý alǵan bolatyn.
Usynylǵan jobalar derbestikti keńeıtýge, sensorlyq daǵdylardy damytýǵa jáne múgedektigi bar adamdardy jumyspen qamtýdy yntalandyrýǵa baǵdarlanǵan.
Usynylǵan sheshimderdiń praktıkalyq mańyzdylyǵy jáne olardyń erekshe qajettilikteri bar adamdardy belsendi ómirge yqpaldastyrýǵa tıgizetin áseri týraly QR Eńbek jáne halyqty áleýmettik qorǵaý mınıstriniń keńesshisi Zahıra Beǵalıeva aıtyp berdi.
-Jasandy ıntellekt oqý men jumystaǵy kedergilerdi joıa otyryp, múgedektigi bar adamdardyń ómirin túbegeıli ózgertedi. Áleýmettik ınnovatsııalar kóbinese erekshe qoldaýdy qajet etedi, sondyqtan biz osyndaı tehnologııalarǵa ınvestıtsııa salýdyń mańyzdylyǵyn kórsetý úshin osynda ınvestorlar qaýymdastyǵyn jınadyq. Bizdiń maqsatymyz – ázirleýshilerdiń ıdeıalaryn prototıpten naqty engizýge deıin jetkizý. Qoljetimdi ınklıýzıvti ortany qurý – bul jalpymemlekettik jaýapkershilik», – dedi Zahıra Beǵalıeva.
Іs-sharany qorytyndylaı kele, qatysýshylar memlekettik apparattyń, áleýmettik jaýapty bıznestiń jáne úkimettik emes uıymdardyń kúsh-jigerin biriktirý ıdeıalardy naqty, jumys isteıtin quraldarǵa aınaldyrýǵa múmkindik beretinin atap ótti.
-ITMLab 2.0 aıasynda jobalardy iske asyrý uzaq merzimdi áleýmettik qundylyqty qalyptastyrýǵa jáne teń múmkindikter qoǵamyn qurýǵa eleýli úles qosady,-delingen habarlamada.
Osyǵan deıin múgedektigi bar 10 adamdy jumyspen qamtyǵan uıymdarǵa salyqtyq qoldaý saqtalatyny týraly jazdyq.